इटहरी : राष्ट्रिय स्वतन्त्र पार्टी (रास्वपा)का वरिष्ठ नेता तथा झापा–५ बाट प्रतिनिधिसभा सदस्यमा निर्वाचित बालेन्द्र शाह (बालेनं)ले आफ्नो चुनावी अभियानमा भएको खर्चको विवरण सार्वजनिक गरेका छन्।
उनले निर्वाचन आयोगसमक्ष पेश गरेको विवरणअनुसार चुनावी अभियानमा कूल १४ लाख १७ हजार २८९ रुपैयाँ खर्च भएको देखिएको छ।
उक्त विवरणमा प्रचारप्रसार, यात्रा, खानपानलगायतका शीर्षकमा खर्च उल्लेख गरिएको छ। त्यसअनुसार खाजा खर्चमा २८ हजार ९७० रुपैयाँ खर्च भएको जनाइएको छ भने पाँच पटकको हवाई यात्रामा ३५ हजार रुपैयाँ खर्च भएको विवरणमा उल्लेख छ।
बालेनले आयोगमा पेश गरेको निवेदनमा आफूले गरेको सम्पूर्ण खर्च प्रतिनिधिसभा निर्वाचन ऐन २०७४ को दफा ७२ तथा आयोगले स्वीकृत गरेको निर्वाचन आचारसंहिताअनुसार सार्वजनिक गरिएको बताएका छन्।
उनले पारदर्शितालाई प्राथमिकता दिँदै चुनावी खर्च खुला रूपमा सार्वजनिक गरेको बताएका छन्।
राजनीतिक दल र उम्मेदवारले खर्च विवरण सार्वजनिक गर्नुपर्ने प्रावधान भए पनि व्यवहारमा धेरैले समयमै विवरण नदिने गरेको अवस्थामा बालेनले सार्वजनिक रूपमा खर्च देखाएपछि पारदर्शिता भएको जनाइएको छ।
Discussion about this post