इटहरी : इटहरी २० कि दिलकुमारी राई मंगलबार बिहान आक्रोशित मुद्रामा थिइन् । इटहरीमा केही दिनयता देखि हुन थालेको लोडसेडिङका कारण उनी आक्रोशित भएकी हुन् । नेपाल विद्युत् प्राधिकरणका कार्यकारी निर्देशक कुलमान घिसिङले आफ्नो कार्यकाल पूरा गरेर बिदा भएसँगै इटहरीमा लोडसेडिङ हुन थालेको उनको तर्क छ ।
‘इटहरीमा लोडसेडिङ हुन थालेको आज ठीक ६ दिन भयो, सरकारको लापरबाहीका कारण अहिले व्याप्त रुपमा लाइन जान थालेको छ ।’ उनका अनुसार अहिले इटहरी क्षेत्रमा दैनिक १८ घण्टासम्म लाइन जान थालेको छ । गत २०७४ साउन २७ गते इटहरीमा आएको भीषण बाढीका कारण इटहरीमा ४ दिन लाइन काटिएको थियो । त्यसपछि भने इटहरीमा खासै लोडसेडिङ नभएको भएपनि अहिले केही दिनयता लाइन जान थालेपछि स्थानीय आक्रोशित भएका छन् ।
राईले टाकुरासँग भनिन्, ‘हामीलाई जो कार्यकारी आएपनि लाइन चाहियो, अहिले कुलमानको कार्यकाल सकिने बित्तिकै लाइन जान थालेको छ, भोलिका दिनमा यहि हिसाबले लोडसेडिङ हुने हो भने सडकमा सरकारबिरुद्ध आगो बल्न सक्छ, यो दिन नआओस् ।’ उनले सरकारकै कमजोरीका कारण अहिले लाइनमा समस्या भएको औल्याउँदै एक हप्ता अगाडिबाट इटहरीमा लोडसेडिङ हुन थालेको र यसको तत्काल समाधान नभएमा सरकारबिरुद्ध सडकमा आगो बल्ने चेतावनी दिईन् ।
सुनसरी झुम्काका रोमु अधिकारीले पनि केही दिनयता लाइनमा समस्या भएको बताए । उनले भने, ‘अहिले लाइन जाने आउने क्रम चलिरहेको छ, दिनैभरी लाइन जाने र राती मात्रै आउने गरेको छ । निकै समस्या भईरहेको छ ।’ अहिले लाइन नआएका कारण आँफूहरु मारमा परेको उनले सुनाए ।
इटहरी २० कै गंगा अधिकारीले अहिले आफ्ना छोराछोरीको अनलाइन कक्षा सञ्चालन भइरहेकाले लाइन नआउँदा समस्या रहेको बताईन् । ‘लाइन नआएकाले अहिले छोराछोरीको अनलाइन कक्षामा पनि समस्या भईरहेको छ,’ उनले टाकुरासँग भनिन्, ‘अनलाइन कक्षाको एडभान्समै पैसा तिर्नुपर्ने बाध्यता छ, लाइन नआएकाले छोराछोरीको पढाईमा मात्र नभई अन्य कुरामा पनि बाधा भएको छ ।’
स्थानीय विशाल रेग्मीका अनुसार बिद्युत् प्राधिकरणका कर्मचारीले सर्वसाधारण मानिसको गुनासोलाई बेवास्ता गर्ने गरेका छन् । उनले टाकुरासँग भने, ‘मैले पटक–पटक प्राधिकरणमा फोन गर्दा कर्मचारीले हामीले केही गर्न सक्दैनौँ, भन्ने खालका जवाफ दिने गरेका छन्, हामी केही गर्न सक्दैनौँ, अब सधैँ यस्तै हो, तपाईँहरु तात्नुहोस् भन्ने खालका जवाफ दिन्छन् ।’ उनका अनुसार लाइन सम्बन्धी जानकारी लिनका लागि फोन गर्दा विद्युत् प्राधिकरण इटहरी वितरण केन्द्रका कर्मचारी पन्छिने गरेका छन् ।
सुनसरीको दुहवी सब–वितरण केन्द्र रहेको इटहरी वितरण केन्द्रले यो क्षेत्रमा केही दिनयता लाइन काटेकाले अहिले स्थानीय सर्वसाधारण मानिसहरु आक्रोशित रहेका छन् । यस बिषयमा विद्युत् प्राधिकरण इटहरीमा बुझ्दा प्राविधिक कारणले लाइन गएको जवाफ दिने गरेका छन् ।
Discussion about this post