इटहरी : सङ्गीत साधना प्रतिष्ठान इटहरीको आयोजनामा सञ्चालित ‘साहित्य, सङ्गीत उत्सव २०८३’ अन्तर्गत तेस्रो शृङ्खलामा प्रसिद्ध कवि तथा गीतकार आनन्द अधिकारीको गीति तथा काव्य यात्रामाथि विशेष कार्यक्रम सम्पन्न भएको छ।
शनिबार आयोजित कार्यक्रममा गीतकार अधिकारीका चर्चित गीतहरू विभिन्न कलाकारहरूले प्रत्यक्ष प्रस्तुत गरेका थिए।
कार्यक्रममा कृष्ण भारद्वाज, सत्यनारायण चौधरी, जानुका कोइराला, केशव कार्की, रणदीप भुजेल, रञ्जिता श्रेष्ठ, सुजाता विष्ट, टेरिसा परियार, प्रीतम आचार्य, अङ्कुर भट्टराई र भूमा अधिकारी लगायतले स्वर दिएका थिए।
अधिकारीद्वारा रचित ‘पिरतीमा के मात्रै भएन’, ‘जाउँ क्यारे उडेर माथि जूनैमा’, ‘तिमीबिनाको जीवन सोच्न सम्म नि म सक्दिनँ’, ‘ओराली लागेको हरिणको चाल भो’, ‘फूल भन्छ फुलिरहुँ’ लगायतका लोकप्रिय गीतहरू प्रस्तुत हुँदा दर्शक–श्रोताले भरपुर साथ दिएका थिए।
कार्यक्रममा तबलामा शर्मिला सिग्देल, गिटारमा श्याम सुनुवार, बेस गिटारमा प्रवेश राई, किबोर्डमा विदुर कार्की तथा अक्टोप्याडमा विपिन श्रेष्ठले सङ्गीत संयोजन गरेका थिए।
गीत प्रस्तुतिसँगै गीतकार अधिकारीले आफ्ना चर्चित कविता ‘तिम्रो शिरफूल’, ‘घाइते ईश्वर’ र ‘हे परी १’ वाचन गरेका थिए। कविता वाचनमार्फत उनले आफ्ना सिर्जनात्मक यात्राका अनुभव र भावनासमेत श्रोतामाझ साझा गरेका थिए।
सङ्गीत साधना प्रतिष्ठानका महासचिव राजु केसी सहजकर्ता रहेको कार्यक्रमको अध्यक्षता प्रदीपकुमार रेग्मीले गरेका थिए भने प्रमुख आमन्त्रितका रूपमा रेवतीरमण भण्डारी सहभागी थिए।
कार्यक्रमको अन्त्यमा धन्यवाद ज्ञापन गर्दै गीतकार अधिकारीले आफूलाई स्वर्गीय गोपाल योञ्जनको आशीर्वाद प्राप्त भएको उल्लेख गरे। उनले भने, ‘अन्तिममा बाँच्ने त तिनै शब्द नै हुन्।’
साहित्य र सङ्गीतको संगम बनेको उक्त कार्यक्रमले गीतकार आनन्द अधिकारीको सिर्जना यात्रा, नेपाली गीत–सङ्गीतमा उनको योगदान तथा काव्य चेतनालाई नयाँ पुस्तासमक्ष पुनः उजागर गरेको आयोजकले जनाएको छ।
खासगरी ‘साहित्य, सङ्गीत उत्सव २०८३’ शृङ्खलालाई निरन्तरता दिइने जनाइएको छ।
Discussion about this post