इटहरी : सुनसरीको भोक्राहा नरसिंह गाउँपालिकाका नागरिकले अब स्थायी लेखा नम्बर (प्यान) दर्ताका लागि इटहरी पुग्नुपर्ने बाध्यताको अन्त्य हुने भएको छ।
गाउँपालिकाबाटै प्यान दर्ता सेवा सञ्चालन गर्ने तयारीस्वरूप गाउँपालिका र आन्तरिक राजस्व कार्यालय इटहरीबीच सम्झौता भएको छ।
सम्झौतापत्रमा गाउँपालिकाका प्रमुख प्रशासकीय अधिकृत जयप्रसाद गौतम र आन्तरिक राजस्व कार्यालय इटहरीका प्रमुखले हस्ताक्षर गरेका छन्। सम्झौतापछि व्यक्तिगत तथा व्यावसायिक प्रयोजनका लागि आवश्यक पर्ने प्यान दर्ता सेवा स्थानीय तहबाटै उपलब्ध गराइनेछ।
यसअघि प्यान दर्ताका लागि सेवाग्राहीहरू इटहरीस्थित आन्तरिक राजस्व कार्यालय पुग्नुपर्ने अवस्था थियो। अब गाउँपालिकाबाटै सेवा सञ्चालन भएपछि स्थानीय नागरिकको समय, खर्च र झन्झट घट्ने अपेक्षा गरिएको छ।
गाउँपालिका अध्यक्ष अजमल अख्तर आजादले स्थानीय तहबाटै करसम्बन्धी सेवा विस्तार हुनु नागरिकमैत्री सार्वजनिक सेवा प्रवाहको महत्वपूर्ण उपलब्धि भएको बताए।
उनका अनुसार यसले सेवामा नागरिकको पहुँच सहज बनाउनुका साथै कर प्रशासनलाई थप व्यवस्थित, पारदर्शी र प्रभावकारी बनाउन सहयोग पुग्नेछ।
आन्तरिक राजस्व कार्यालय इटहरीले पनि स्थानीय तहसँगको सहकार्यले कर प्रशासनलाई नागरिकको घरदैलोसम्म पुर्याउने सरकारको नीतिलाई प्रभावकारी रूपमा कार्यान्वयन गर्न मद्दत पुग्ने जनाएको छ।
सेवा सञ्चालनका लागि गाउँपालिकाका कर्मचारीलाई आवश्यक प्राविधिक सहयोग, प्रणाली सञ्चालनसम्बन्धी अभिमुखीकरण तथा सहजीकरण निरन्तर उपलब्ध गराइने जानकारी दिइएको छ।
गाउँपालिकाले आवश्यक प्राविधिक तयारी पूरा गरी निकट भविष्यमै प्यान दर्ता सेवा औपचारिक रूपमा सञ्चालनमा ल्याइने जनाएको छ। सेवा सञ्चालनपछि स्थानीय व्यवसायी, उद्योगी, उद्यमी, कर्मचारी, संघसंस्था तथा सर्वसाधारणले आफ्नै पालिकाबाट सहज रूपमा प्यान दर्ता गर्न सक्नेछन्।
Discussion about this post