गिरिजाबाबुको बैठक कक्षमा प्रचण्ड–माधव–शेखरको राजनीतिक संवाद

विराटनगर : नेपाली कम्युनिस्ट पार्टी (नेकपा)का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’, सहसंयोजक एवं पूर्वप्रधानमन्त्री माधवकुमार नेपाल र नेपाली कांग्रेसका नेता डा. शेखर कोइरालाबीच शुक्रबार विराटनगरमा समसामयिक राजनीतिक विषयमा भेटवार्ता भएको छ।

विराटनगरस्थित कोइराला निवासमा भएको भेटमा मुलुकको पछिल्लो राजनीतिक अवस्था, संसद्को भूमिका, राष्ट्रिय सरोकारका विषय तथा विकसित राजनीतिक घटनाक्रमबारे विचारविमर्श भएको जनाइएको छ।

पछिल्लो समय सरकारको कार्यशैली, संसद्को प्रभावकारिता र राष्ट्रिय राजनीतिक मुद्दालाई लिएर प्रमुख दलबीच मतभेद देखिइरहेका बेला शीर्ष नेताबीच भएको यो भेटलाई अर्थपूर्ण रूपमा हेरिएको छ।

भेटपछि सञ्चारकर्मीसँग कुरा गर्दै प्रचण्डले समसामयिक राजनीतिक विषयमा केन्द्रित रहेर छलफल भएको बताए। उनले रास्वपाको महाधिवेशन, कांग्रेसको पछिल्लो अवस्था तथा समसामयिक राजनीतिक परिस्थितिबारे पनि विचार आदानप्रदान भएको जानकारी दिए।

पूर्वप्रधानमन्त्रीसमेत रहेका नेता नेपालले भेटलाई सामान्य राजनीतिक संवादका रूपमा व्याख्या गर्दै देशको वर्तमान अवस्थाबारे विचार आदानप्रदान भएको बताए।

डा. कोइरालाका स्वकीय सचिव दिनेशचन्द्र थपलियाका अनुसार भेटमा मुलुकको वर्तमान राजनीतिक अवस्था, दलहरूबीचको सहकार्य र आगामी रणनीतिबारे छलफल भएको थियो।

नेताहरूले केही समयअघि कोइराला निवासमा भएको आगलागीपछिको अवस्था अवलोकन गर्दै कोइराला परिवारसँग भेटघाट पनि गरेका थिए। भेटका क्रममा प्रचण्डले बैठक कक्षतर्फ संकेत गर्दै ‘गिरिजाबाबुकै बैठक कक्ष रहेछ होइन ?’ भनेर सोध्दा डा. कोइरालाले ‘त्यही हो’ भन्दै जवाफ दिएका थिए।

प्रमुख दलका शीर्ष नेताहरूबीच पछिल्लो समय विभिन्न राष्ट्रिय मुद्दामा अनौपचारिक संवाद र परामर्श भइरहेका छन्। त्यसैक्रममा विराटनगरमा भएको प्रचण्ड, माधव नेपाल र शेखर कोइरालाबीचको भेटलाई आगामी राजनीतिक घटनाक्रमको सन्दर्भमा पनि चासोका साथ हेरिएको छ।