इटहरी : कोशी प्रदेशका प्राकृतिक, सांस्कृतिक तथा ऐतिहासिक गन्तव्यको अनुभव र सम्भावनालाई समेटेर पर्यटन व्यवसायी बासुदेव बरालद्वारा लिखित ‘कोशी (गन्तव्य अनुभव र सम्भावना)’ पुस्तकमाथि शनिबार इटहरीमा परिचर्चा कार्यक्रम सम्पन्न भएको छ।
कार्यक्रममा सहभागी वक्ताहरूले कोशी प्रदेशमा पर्यटनको अपार सम्भावना भए पनि त्यसको प्रभावकारी प्रचार–प्रसार, अध्ययन र प्रवर्द्धनमा अझै पर्याप्त काम हुन नसकेको बताएका छन्।
संगीत साधना प्रतिष्ठान नेपाल, इटहरीको आयोजनामा भएको कार्यक्रममा पुस्तकमाथि उपप्राध्यापक तथा अनुसन्धानकर्मी अर्जुन उप्रेती र पत्रकार विराट अनुपमले परिचर्चा गरेका थिए।
परिचर्चाका क्रममा उप्रेतीले पुस्तकले कोशी प्रदेशका पर्यटकीय गन्तव्यलाई इतिहास, संस्कृति, भूगोल, अनुभूति र पर्यटन विकासको सम्भावनालाई पनि पाठकमाझ पुर्याउने प्रयास गरेको बताए।
उनले पर्यटन विकासका लागि पूर्वाधार निर्माणसँगै अनुसन्धानमा आधारित लेखन र गन्तव्यको अभिलेखीकरण आवश्यक रहेको धारणा राखे। खासगरी लेखक बरालले पुस्तकमा आफैँ पुगेर त्यहाँको संस्कृति र रहनसहनबारेको ब्याख्या गरेको उप्रेतीले बताए।
पत्रकार अनुपमले पुस्तकले पर्यटनलाई व्यवसायिक दृष्टिले मात्र नभई स्थानीय समाज, संस्कृति र पहिचानसँग जोडेर हेरेको उल्लेख गर्दै यस्ता कृतिले आन्तरिक पर्यटन प्रवर्द्धनमा महत्त्वपूर्ण योगदान पुर्याउने बताए।
उनले कोशी प्रदेशका धेरै गन्तव्य अझै राष्ट्रिय तथा अन्तर्राष्ट्रिय रूपमा पर्याप्त रूपमा चिनिन नसकेको भन्दै यस्ता पुस्तकले त्यसको प्रवर्द्धनमा सकारात्मक भूमिका खेल्ने विश्वास व्यक्त गरे।
कार्यक्रमका प्रमुख अतिथि तथा कोशी प्रदेशका पूर्व आन्तरिक मामिला तथा कानून मन्त्री रेवतीरमण भण्डारीले कोशी प्रदेश प्राकृतिक, धार्मिक, सांस्कृतिक र साहसिक पर्यटनका दृष्टिले देशकै सम्भावनायुक्त प्रदेश भए पनि त्यसअनुसार पर्यटन विकास हुन नसकेको बताए।
उनले स्थानीय तह, निजी क्षेत्र र पर्यटनसँग सम्बन्धित संघ–संस्थाले समन्वय गरेर पर्यटकीय गन्तव्यको संरक्षण, पूर्वाधार विकास र प्रचार–प्रसारलाई प्राथमिकता दिनुपर्ने धारणा राखे।
लेखक तथा पर्यटन व्यवसायी बरालले पुस्तक लेख्नुको उद्देश्य कोशी प्रदेशका पर्यटकीय सम्पदालाई एकै स्थानमा दस्तावेजीकरण गर्नुका साथै नयाँ पुस्तालाई आफ्नै प्रदेशका गन्तव्यबारे जानकारी गराउनु रहेको बताए।
उनले कोशी प्रदेशभित्र रहेका धेरै स्थान अझै ओझेलमा रहेकाले तिनको प्रचार र प्रवर्द्धन आवश्यक रहेको उल्लेख गरे।
कार्यक्रमका अध्यक्ष तथा संगीत साधना प्रतिष्ठान नेपालका अध्यक्ष प्रदीप रेग्मीले पर्यटन प्रवर्द्धनका लागि सरकारी प्रयास मात्र पर्याप्त नहुने भन्दै साहित्य, सञ्चारमाध्यम र नागरिक समाजको पनि उत्तिकै महत्त्वपूर्ण भूमिका रहने बताए।
उनले यस्ता पुस्तक र परिचर्चाले पर्यटनप्रति नागरिकको चासो बढाउने विश्वास व्यक्त गरे।
Discussion about this post