धरान : धरानस्थित बीपी कोइराला स्वास्थ्य विज्ञान प्रतिष्ठानमा उपचारका लागि आएका बिरामीलाई सस्तो मूल्यमा औषधि मिलाइदिने प्रलोभन देखाएर निजी मेडिकलमा पठाई अवैध कमिसनको चलखेल गरेको आरोपमा प्रहरीले १० जनालाई नियन्त्रणमा लिएको छ।
इलाका प्रहरी कार्यालय धरान र अस्थायी प्रहरी पोस्ट घोपाबाट खटिएको संयुक्त प्रहरी टोलीले सोमबार प्रतिष्ठानको इमर्जेन्सी भवनअगाडि शंकास्पद गतिविधि गरिरहेको अवस्थामा उनीहरूलाई नियन्त्रणमा लिएको हो।
पक्राउ पर्नेमा सप्तरीको अग्निसाइर कृष्णासवरन गाउँपालिका–३ का ३७ वर्षीय रञ्जितकुमार चौधरी, राजविराज–६ की २७ वर्षीया रबिना मण्डल, भोजपुर आमचोक–८ का ३५ वर्षीय हस्त श्रेष्ठ, धरान–१५ का २० वर्षीय सागर पोखरेल, मोरङ लेटाङ–३ का २९ वर्षीय सान्बिन किराती, धरान–६ का २३ वर्षीय मनिष बुढाथोकी, उदयपुर चौदण्डीगढी–५ का ४० वर्षीय उमेश कुमार चौधरी, धरान–१७ का ३५ वर्षीय धिरोज निरौला, इनरुवा–२ का ३१ वर्षीय रोहित मेहता तथा धरान–११ का १८ वर्षीय बिनोद भट्टराई रहेका छन्।
प्रहरीका अनुसार प्रतिष्ठानमा उपचारका लागि आएका बिरामीलाई विभिन्न निजी मेडिकलबाट सस्तोमा औषधि उपलब्ध गराइदिने भन्दै प्रलोभनमा पारेर कमिसनको कारोबार भइरहेको भन्ने सूचनाका आधारमा निगरानी बढाइएको थियो।
नियन्त्रणमा लिइएका सबैलाई इलाका प्रहरी कार्यालय धरानमा राखी उनीहरूको संलग्नता, निजी मेडिकलसँगको सम्बन्ध तथा कमिसन कारोबारबारे थप अनुसन्धान भइरहेको प्रहरीले जनाएको छ।
यो पनि – बीपी प्रतिष्ठानको गेटमै बिचौलिया, निजी अस्पतालमा बिरामी पठाएर कमिसनको खेल
Discussion about this post