विराटनगर : आर्थिक कारोबार विस्तारसँगै कोशी प्रदेशमा बैंकिङ कसुरका घटनाले चिन्ताजनक रूप लिन थालेका छन्।
नेपाल प्रहरीको पछिल्लो तथ्याङ्कले प्रदेशमा बैंकिङ कसुर कानुनी मुद्दाको विषय मात्र नभई आर्थिक अनुशासन र व्यावसायिक विश्वासमाथिको चुनौतीका रूपमा उभिएको देखाएको छ।
देशभर दर्ता भएका १२ हजार ९५० बैंकिङ कसुरका मुद्दामध्ये कोशी प्रदेशमा मात्रै १ हजार १५७ वटा मुद्दा दर्ता भएका छन्। यो संख्या उपत्यकाबाहिरका प्रदेशमध्ये तेस्रो धेरै हो। तथ्याङ्कअनुसार मधेश प्रदेशमा १ हजार ७५७ र लुम्बिनी प्रदेशमा १ हजार २१८ मुद्दा दर्ता भएका छन् भने त्यसपछि कोशी प्रदेश रहेको छ।
कोशीपछि बागमती प्रदेश (काठमाडौं उपत्यका बाहेक)मा १ हजार २१, गण्डकीमा ९९४, सुदूरपश्चिममा ४२६ र कर्णालीमा ३५५ वटा बैंकिङ कसुरका मुद्दा दर्ता भएका छन्। काठमाडौं उपत्यकामा मात्रै ६ हजार २२ मुद्दा दर्ता भएका छन्।
प्रदेशका औद्योगिक तथा व्यापारिक केन्द्र विराटनगर, इटहरी, धरान, दमक, बिर्तामोडलगायत क्षेत्रमा बैंकिङ कारोबारको मात्रा बढेसँगै चेक बाउन्स, ऋणसम्बन्धी विवाद र वित्तीय ठगीका घटनासमेत बढिरहेका छन्।
प्रहरीका अनुसार बैंकिङ कसुरअन्तर्गत दर्ता हुने अधिकांश मुद्दा चेक अनादर (चेक बाउन्स)सँग सम्बन्धित छन्।
कारोबारको सुनिश्चितता बिना चेक जारी गर्ने, भुक्तानी हुने पर्याप्त रकम खातामा नराख्ने तथा व्यावसायिक लेनदेनमा चेकको दुरुपयोग गर्ने प्रवृत्तिले अदालत र प्रहरीमा मुद्दाको चाप बढाइरहेको छ।
कानुन व्यवसायीहरूका अनुसार बैंकिङ कसुरका घटनाले आर्थिक क्षति मात्र होइन, व्यवसायीबीचको विश्वास, लगानीको वातावरण र वित्तीय अनुशासनमा पनि प्रत्यक्ष असर पारिरहेको छ।
पछिल्ला वर्षहरूमा बैंकिङ प्रणालीमा पहुँच बढे पनि वित्तीय साक्षरता र कानुनी दायित्वबारे पर्याप्त सचेतना नहुँदा यस्ता मुद्दा बढ्दै गएको उनीहरूको भनाइ छ।
प्रहरीले बैंकिङ कारोबार गर्दा पर्याप्त रकमको सुनिश्चितता गरेर मात्र चेक जारी गर्न, लिखित सम्झौतामा आधारित कारोबार गर्न र शंकास्पद वित्तीय लेनदेनबाट सावधान रहन आग्रह गरेको छ।
Discussion about this post