इटहरी : कोशी प्रदेश सरकार विस्तारमा देखिएको मन्त्रालय भागबन्डाको विवाद केन्द्रीय नेतृत्वको हस्तक्षेपपछि टुंगिएको छ।
नयाँ सत्तासमीकरणअनुसार एमालेले पाँच र नेपाली कम्युनिस्ट पार्टी (नेकपा)ले चार मन्त्रालय पाउने सहमति भएको हो।
प्रदेशमा दुई दलबीच मन्त्रालयको संख्यामा सहमति जुट्न नसकेपछि भागबन्डाको विषय केन्द्रीय नेतृत्वसम्म पुगेको थियो। एमाले स्रोतका अनुसार नेकपा संयोजक पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीबीच भएको छलफलपछि नेकपालाई चार मन्त्रालय दिन सहमति जुटेको हो।
यसअघि नेकपाले चार मन्त्रालयसँगै एक राज्यमन्त्री माग गर्दै आएको थियो भने एमाले तीन मन्त्रालय र एक राज्यमन्त्री दिन तयार थियो। प्रदेश तहमा पटकपटक छलफल गर्दा पनि सहमति नजुटेपछि शीर्ष नेताबीच छलफल भएको थियो।
मन्त्रालय संख्या टुंगिए पनि कुन मन्त्रालय कसले लिने भन्ने विषय भने अझै बाँकी छ। नेकपा संसदीय दलका नेता इन्द्रबहादुर आङ्बोले मुख्यमन्त्री हिक्मतकुमार कार्कीसँग छलफल गरेपछि मन्त्रालयको जिम्मेवारीसहितका विषय टुंगो लाग्ने बताए।
नेकपाले कांग्रेस सरकारबाट बाहिरिएपछि रिक्त रहेको आर्थिक मामिला तथा योजना मन्त्रालय आफ्नो भागमा पार्न चाहेको छ। कांग्रेसले यसअघि भौतिक पूर्वाधारसहित चार मन्त्रालय सम्हालेको थियो।
चार मन्त्रालय पाउने भएपछि नेकपाभित्र पनि आन्तरिक भागबन्डा मिलाइएको छ। पूर्वमाओवादी पक्षले तीन र पूर्वएकीकृत समाजवादी पक्षले एक मन्त्रालय लिने सहमति भएको जनाइएको छ।
कोशी प्रदेशसभामा नेकपाका १७ सांसद छन्। तीमध्ये पूर्वमाओवादी पक्षका १३ र पूर्वएकीकृत समाजवादी पक्षका चार सांसद छन्।
दुवै दलले आइतबारसम्म मन्त्रालयको जिम्मेवारी टुंग्याएर सोमबार नयाँ मन्त्रीलाई शपथ गराउने तयारी गरेका छन्।
Discussion about this post