धरान : सुनसरीका पत्रकार भोजराज श्रेष्ठद्वारा लिखित ‘सुनसरीको मिडिया परिदृश्य’ पुस्तक लोकार्पण गरिएको छ। धरानस्थित महेन्द्र बहुमुखी क्याम्पसको सभाहलमा आइतबार आयोजित कार्यक्रममा पुस्तक लोकार्पण गरिएको हो।
कार्यक्रममा प्रा.डा. टंकप्रसाद न्यौपाने, वरिष्ठ पत्रकार हर्ष सुब्बा, धरान उपमहानगरपालिकाका निवर्तमान नगर प्रमुख तिलक राईलगायतले पुस्तक लोकार्पण गरेका थिए।
लोकार्पणपछि पुस्तकबारे प्रा.डा. न्यौपाने र वरिष्ठ पत्रकार सुब्बाले चर्चा गरेका थिए। न्यौपानेले ‘सुनसरीको मिडिया परिदृश्य’ सुनसरीको सञ्चार क्षेत्रबारे अध्ययन गर्न चाहनेका लागि पठनीय र सङ्ग्रहनीय कृति भएको बताए।
उनले पुस्तकमा सुनसरीको सञ्चार तथा पत्रकारिताको विकासक्रमलाई समेट्ने प्रयास गरिएको भन्दै आगामी संस्करणमा थप विषयवस्तु समावेश गर्न र पुस्तकमा रहेका त्रुटिहरू सच्याउँदै लैजान सुझाव दिए।
‘पुस्तक पठनीय र सङ्ग्रहनीय छ,’ न्यौपानेले भने, ‘आगामी संस्करणमा थप विषयवस्तु समेट्दै अहिले भएका त्रुटिहरूलाई सच्याउँदै लैजानुपर्छ।’
वरिष्ठ पत्रकार सुब्बाले सुनसरीको पत्रकारिताको विकासक्रमलाई धरानको पत्रकारितासँग जोडेर चर्चा गरे। उनले धरानदेखि सुनसरी हुँदै नेपालको पत्रकारिता र विश्व पत्रकारिताको इतिहाससम्मको विकासक्रमबारे चर्चा गरेका थिए।
सुब्बाले ‘सुनसरीको मिडिया परिदृश्य’ले जिल्लाको पत्रकारिता तथा सञ्चार क्षेत्रले समयक्रममा भोगेको परिवर्तन र विकासलाई बुझ्न सहयोग गर्ने बताए।
स्थानीय सञ्चार माध्यम, पत्रकारिता अभ्यास तथा सञ्चार क्षेत्रमा आएको परिवर्तनलाई दस्तावेजीकरण गर्ने प्रयासका रूपमा पुस्तकको महत्व रहेको उनको भनाइ थियो।
पुस्तकका लेखक श्रेष्ठले सुनसरीको मिडिया क्षेत्रका बारेमा करिब सात वर्षको अध्ययन, शोध तथा अनुसन्धानपछि पुस्तक तयार गरेको बताए।
सुनसरीमा सञ्चारमाध्यमको विकास, पत्रकारिता अभ्यास र यस क्षेत्रमा आएका परिवर्तनलाई अभिलेखीकरण गर्ने उद्देश्यले पुस्तक तयार गरिएको उनले जानकारी दिए।
‘सुनसरीको मिडिया क्षेत्रबारे अध्ययन, अनुसन्धान र सामग्री सङ्कलन गर्न सात वर्ष लाग्यो,” श्रेष्ठले भने, ‘यतिका समयको अध्ययन र अनुसन्धानपछि पुस्तक प्रकाशन गर्न सकेको हुँ।’
उनका अनुसार सुनसरीको पत्रकारितासँग सम्बन्धित विभिन्न पक्षलाई समेटेर पुस्तक तयार गरिएको छ।
जिल्लामा सञ्चारमाध्यमको विकाससँगै पत्रकारिता क्षेत्रमा आएका परिवर्तन, पत्रकारिताको अभ्यास र सञ्चार क्षेत्रसँग सम्बन्धित विषयलाई पुस्तकमा समेट्ने प्रयास गरिएको उनले बताए।
पुस्तकका लेखक श्रेष्ठ ब्लाष्ट टाइम्स दैनिकका कार्यकारी सम्पादक हुन्। उनी धरानमा रहेर विगत १८ वर्षदेखि पत्रकारिता तथा शिक्षण पेसामा आबद्ध छन्।
पत्रकारितासँगै शिक्षण र अध्ययन–अनुसन्धानमा समेत सक्रिय श्रेष्ठले आफ्नो व्यावसायिक अनुभव र लामो समयको अध्ययनलाई पुस्तकमार्फत दस्तावेजीकरण गरेका हुन्।
स्थानीय पत्रकारिताको इतिहास, सञ्चारमाध्यमको विकास र पत्रकारितामा आएका परिवर्तनलाई समेटेर प्रकाशित यस्ता कृतिले जिल्लाको सञ्चार इतिहासलाई अभिलेखका रूपमा सुरक्षित गर्न महत्वपूर्ण भूमिका खेल्ने कार्यक्रममा सहभागी वक्ताहरूको भनाइ थियो।
कार्यक्रममा उपप्राध्यापक राजेश विद्रोहीले सहजीकरण गरेको कार्यक्रममा सञ्चार तथा पत्रकारिता क्षेत्रसँग सम्बन्धित व्यक्तिहरू, लेखक, प्राध्यापक, पत्रकार तथा साहित्यप्रेमीहरूको उपस्थिति थियो।
धरान रिडर्स ग्रुपले प्रकाशन गरेको पुस्तकको मूल्य ६९९ रुपैयाँ तोकिएको छ। पुस्तक सुनसरीको सञ्चार तथा पत्रकारिताको विकासक्रम बुझ्न चाहने पाठक, विद्यार्थी, अनुसन्धानकर्ता तथा पत्रकारिता क्षेत्रका लागि उपयोगी सामग्रीका रूपमा आएको प्रकाशकले जनाएको छ।
Discussion about this post