धरान : बिरामी बुबाको उपचारका लागि रकम बोकेर धरान आउँदै गरेका झापाको शिवसताक्षी–११ स्थित श्री राष्ट्रिय रमणीय आदर्श माध्यमिक विद्यालयका प्रधानाध्यापक गिरीराज शेर्माको मोटरसाइकल दुर्घटनामा मृत्यु भएको छ।
४९ वर्षीय शेर्मा शुक्रबार दिउँसो मोरङको केराबारीबाट धरानतर्फ आउँदै गर्दा धरान–६ पानबारीस्थित मदन भण्डारी लोकमार्गमा मे १२ प २०३ नम्बरको मोटरसाइकल आफैं अनियन्त्रित भई सडक किनारको बिजुलीको पोलमा ठोक्किँदा घटनास्थलमै मृत्यु भएको थियो।
इलाका प्रहरी कार्यालय धरानका अनुसार सीसीटीभी फुटेजमा मोटरसाइकल अत्यधिक गतिमा नरहेको देखिएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।
प्रहरीका अनुसार शेर्मा आफ्ना प्यारालाइसिसलगायत अन्य स्वास्थ्य समस्याबाट पीडित बुबाको उपचारका लागि आवश्यक रकम जुटाएर बीपी कोइराला स्वास्थ्य विज्ञान प्रतिष्ठान, धरान आउँदै थिए।
उनका बुबा सोही दिन उपचारका लागि प्रतिष्ठानमा भर्ना भएका थिए। तर अस्पताल पुगेर बुबालाई भेट्न नपाउँदै उनी स्वयं दुर्घटनाको सिकार बने।
शेर्मा पाँचथरको तुम्बेवा गाउँपालिका–१ स्थायी निवासी भए पनि हाल झापाको श्री राष्ट्रिय रमणीय आदर्श माध्यमिक विद्यालय, शिवसताक्षी–११ दूधेमा प्रधानाध्यापकका रूपमा कार्यरत थिए।
गणित विषयका शिक्षकका रूपमा परिचित उनी अनुशासित, मेहनती र विद्यार्थीमैत्री शिक्षाकर्मीका रूपमा चिनिन्थे।
उनको असामयिक निधनपछि विद्यालयले गहिरो दुःख व्यक्त गर्दै श्रद्धाञ्जली अर्पण गरेको छ। सहकर्मी शिक्षक, विद्यार्थी, अभिभावक तथा स्थानीय समुदायले शिक्षाक्षेत्रले एक समर्पित प्रधानाध्यापक गुमाएको बताएका छन्।
Discussion about this post