उदयपुर । उदयपुरको कोशी किनारामा रहेका बस्तीहरु सम्भावित बाढीबाट जोखिममा रहेकोले स्थानीइ प्रशासनले सतर्कता अपनाउन स्थानीय बासिन्दाहरुलाई अनुरोध गरेको छ ।
सोलुखुम्बुको महाकुलुङ गाउँपालिका वडा नं. २ र ४ स्थित हुङ्गा खोलामा पहिरो खसेर नदी थुनिएपछि बनेको ताल (ड्याम) फुट्न सक्ने जोखिम बढेपछि उदयपुरका नदी तटीय क्षेत्रमा उच्च सतर्कता अपनाउन स्थानीय प्रशासनले आग्रह गरेको छ ।
जिल्ला प्रहरी कार्यालय उदयपुरका प्रमुख प्रहरी उपरीक्षक राजन चापागाईंका अनुसार बुधबार बिहान करिब ७ बजे हुङ्गा खोलामा ठुलो पहिरो खसेर नदी थुनिएको र करिब एक सय मिटर लामो तथा १५ मिटर गहिरो ताल (ड्याम) बनेको जानकारी प्राप्त भएकोले तटीय क्षेत्रमा सतर्कता गरिएको हो ।
उहाँका अनुसार ड्याम फुटेमा दुधकोशी हुँदै सुनकोशी नदीको बहावसमेत प्रभावित हुन सक्ने भएकाले उदयपुरका विभिन्न नदी तटीय क्षेत्र र बस्तीमा नदीको पानीको सतह अचानक बढ्न सक्ने भन्दै प्रहरीले सतर्कता अपनाउन आग्रह गरेको छ ।
विशेषगरी कटारी नगरपालिका, ताप्ली गाउँपालिका, लिम्चुङबुङ गाउँपालिका, रौतामाई गाउँपालिका, त्रियुगा नगरपालिका, चौदण्डीगढी नगरपालिका र बेलका नगरपालिका अन्तर्गतका दुधकोशी तथा सुनकोशी नदी आसपासका तटीय क्षेत्रमा जोखिम हुनसक्ने प्रहरीको भनाइ छ ।
जिल्ला प्रहरी कार्यालय उदयपुरले सम्भावित जोखिमलाई मध्यनजर गर्दै स्थानीय बासिन्दालाई माछा मार्ने, पौडी खेल्ने, दाउरा तान्ने तथा अन्य कुनै पनि प्रयोजनका लागि नदी किनारतर्फ नजान अनुरोध गरेको छ ।
प्रहरीले नदी किनारमा रहेका स्थानीय तह, समुदाय तथा आम नागरिकलाई नदीको पानीको सतह र सम्भावित बाढीसम्बन्धी सूचना निरन्तर लिइरहन तथा कुनै असामान्य अवस्था देखिए तत्काल सम्बन्धित निकायलाई जानकारी गराउन आग्रह गरेको छ ।
Discussion about this post