उदयपुर । उदयपुरको कटारी नगरपालिका–६ साँघुरीबाट सशस्त्र प्रहरीले १ सय ३० किलो गाँजा बरामद गरेको छ।
सशस्त्र प्रहरी बल नेपाल नं। ५ गण हेडक्वार्टर त्रियुगा, उदयपुरअन्तर्गतको सुरक्षा बेस क्याम्प कटारीले विशेष सूचनाका आधारमा बुधबार राति ठूलो परिमाणमा गाँजा बरामद गरेको हो।
बुधबार राति करिब २ः४० बजे साँघुरीबाट करिब ५ किलोमिटर दक्षिणतर्फ चुरे जंगलको पैदल बाटो हुँदै अवैध रूपमा गाँजा ओसारपसार भइरहेको सूचना पाएपछि सशस्त्र प्रहरीको गस्ती टोली परिचालन गरिएको थियो।
गस्ती टोलीलाई देखेपछि गाँजा बोकेर हिँडेको समूहले बोरा छाडेर फरार भएको प्रहरीले जनाएको छ। टोलीले घटनास्थलबाट ५ वटा बोरा फेला पारेको थियो। ती बोरामा रहेको गाँजा तौल गर्दा १ सय ३० किलो रहेको पुष्टि भएको सशस्त्र प्रहरीले जनाएको छ।
बरामद गाँजा आवश्यक कानुनी कारबाहीका लागि इलाका प्रहरी कार्यालय कटारीमा बुझाइएको छ। गाँजा ओसारपसारमा संलग्न व्यक्तिहरू फरार रहेकाले उनीहरूको खोजी भइरहेको प्रहरीले जनाएको छ।
Discussion about this post