इटहरी : सुनसरीमा विद्यालय परिसरमा राजनीतिक दलका आन्तरिक गतिविधि सञ्चालन नगर्न जिल्ला प्रशासन कार्यालयले राजनीतिक दलसहित विद्यालय र स्थानीय तहलाई निर्देशन दिएको छ ।
विद्यालयमा राजनीतिक दलका चुनाव, बैठक, तालिम, अभिमुखीकरण, आमसभा तथा भेला लगायतका कार्यक्रम सञ्चालन भइरहेको भन्दै गुनासो आएपछि प्रशासनले यस्तो निर्देशन दिएको हो ।
सहायक प्रमुख जिल्ला अधिकारी राममणि निरौलाद्वारा हस्ताक्षरित सूचनामा विद्यालय पठनपाठन र शैक्षिक गतिविधिका लागि मात्र प्रयोग हुनुपर्ने भएकाले राजनीतिक दलका कार्यक्रम सञ्चालन नगर्न सम्बन्धित दलहरूलाई आग्रह गरिएको छ ।
प्रशासनले विद्यालय परिसरमा राजनीतिक गतिविधि हुन नदिन प्रधानाध्यापक, विद्यालय व्यवस्थापन समिति, वडा कार्यालय र स्थानीय तहलाई समेत जिम्मेवार बन्न आग्रह गरेको छ ।
नेपाली कांग्रेसको १५औँ महाधिवेशनअन्तर्गत असोज ३ गतेदेखि वडा अधिवेशन सुरु हुने कार्यतालिकाका बीच प्रशासनले विद्यालयमा राजनीतिक गतिविधि नगर्न सूचना जारी गरेको हो ।
प्रशासनले विद्यालयको शैक्षिक वातावरणमा असर पर्ने गरी राजनीतिक दलका कार्यक्रम सञ्चालन नगर्न सम्बन्धित सबै पक्षलाई आग्रह गरेको जनाएको छ ।
Discussion about this post