इटहरी : हुण्डी कारोबारमा संलग्न रहेको आरोपमा प्रहरीले सुनसरीको धरानबाट एक महिलालाई पक्राउ गरेको छ ।
नेपाल प्रहरी प्रधान कार्यालय केन्द्रीय अनुसन्धान ब्युरो (सीआईबी) मा प्राप्त गोप्य सूचनाका आधारमा गरिएको अनुसन्धानबाट धरान उपमहानगरपालिका–१३ स्थायी ठेगाना भएकी ज्योति शाही हुण्डी कारोबारमा संलग्न रहेको खुलेपछि पक्राउ गरिएको प्रहरीले जनाएको छ ।
प्रहरीका अनुसार शाहीले अन्य व्यक्तिसँगको मिलेमतोमा घरेलु तथा साना उद्योग कार्यालय, इटहरीमा दर्ता भएको शाही मनि ट्रान्सफरको नाममा कृषि विकास बैंक, सेन्चुरी कमर्सियल बैंक, ग्लोबल आईएमई बैंकलगायत ५२ वटा बैंक तथा वित्तीय संस्थामा खाता खोली सञ्चालन गरेको पाइएको छ ।
ती खातामार्फत विभिन्न असम्बन्धित व्यक्तिले विदेशमा आर्जन गरेको रकम अनौपचारिक माध्यमबाट नेपालमा भित्र्याई स–साना भागमा विभाजन गरी कनेक्ट आईपीएसलगायत विद्युतीय माध्यमबाट अन्य व्यक्तिका खातामा रकम पठाउने गरेको अनुसन्धानबाट खुलेको प्रहरीले जनाएको छ ।
यसरी एक अर्ब तीन करोड ८४ लाख ७५ हजार ८४५ बराबरको रकम हुण्डी कारोबारमा प्रयोग भएको प्रारम्भिक अनुसन्धानबाट देखिएको छ ।
हुण्डीसम्बन्धी कसुरमा पक्राउ गर्न सुनसरी जिल्ला अदालतबाट असोज ६ गते अनुमति लिएपछि सीआईबी, कोशी प्रदेश प्रहरी कार्यालय विराटनगर र जिल्ला प्रहरी कार्यालय सुनसरीबाट खटिएको संयुक्त प्रहरी टोलीले असोज ८ गते साँझ करिब ४ः४५ बजेतिर धरान–५ खैरेनीबाट शाहीलाई पक्राउ गरेको हो ।
पक्राउ परेकी शाहीमाथि थप अनुसन्धान भइरहेको प्रहरीले जनाएको छ ।
Discussion about this post