इटहरी : क्यानबेरा, अस्ट्रेलिया: नेपाली गजलका सर्जक, गजलप्रेमी, संगीतकर्मी तथा साहित्य–संगीतप्रेमीहरूको सहभागितामा क्यानबेरामा आयोजना गरिएको ‘गजल मुशायरा–२०२६’ सम्पन्न भएको छ।
मुशायरा परिवारको आयोजनामा शनिबार सम्पन्न कार्यक्रममा मुशायरा परिवारका संयोजक तथा गजलकार जितेन्द्र मल्लको पहिलो गजलसङ्ग्रह ‘ शाजिक ’ समेत औपचारिक रूपमा लोकार्पण गरिएको छ।
क्यानबेराको गुङ्गाह्लिनस्थित द थकाली लाउन्ज एन्ड बारमा सम्पन्न कार्यक्रममा अस्ट्रेलियाका विभिन्न शहर तथा नेपालबाट सहभागी २६ जना गजलकारले आफ्ना गजल वाचन गरेका थिए।
क्यानबेरा, सिड्नी, मेलबर्न, अल्बरी, ब्रिसबेनलगायत शहरबाट आएका सर्जकहरूको सहभागिता रहेको कार्यक्रममा गजल वाचनसँगै रोशन रेग्मी र सुबास लामिछानेको गायन प्रस्तुति पनि रहेको थियो।
कार्यक्रमको विशेष आकर्षणका रूपमा रहेको ‘शाजिक’ सारांश पब्लिकेसन द्वारा प्रकाशित गजलसङ्ग्रह हो। संग्रहमा प्रेम, सम्बन्ध, प्रवास, जन्मभूमि, जीवनदर्शन तथा विभिन्न मानवीय अनुभूतिसँग सम्बन्धित गजलहरू समेटिएका छन्।
लामो समयदेखि नेपाली गजल लेखनमा सक्रिय मल्लले विभिन्न समय र अनुभूतिबाट जन्मिएका आफ्ना रचनालाई पहिलोपटक पुस्तकाकार दिँदै ‘शाजिक’ पाठकमाझ ल्याएका हुन्।
क्यानबेराको मुशायरा मञ्चबाट लोकार्पण भएको ‘शाजिक’ अब पाठकमाझ पुगेको छ। मल्लको पहिलो गजलसङ्ग्रहको अर्को लोकार्पण कार्यक्रम नेपालमा समेत आयोजना गरिने भएको छ।
नेपालमा हुने कार्यक्रमको मिति, स्थान तथा पुस्तक प्राप्त गर्न सकिने विवरण आगामी दिनमा सार्वजनिक गरिने मल्लले बताएका छन्।
सन् २०१४ मा सिड्नीबाट सुरु भएको मुशायरा परिवारको गजल यात्रा अस्ट्रेलियाका विभिन्न शहर हुँदै क्यानबेरासम्म आइपुगेको हो।
गजललाई केन्द्रमा राखेर सर्जक र श्रोतालाई जोड्दै आएको मुशायरा परिवारले अस्ट्रेलियाबाहेक नेपाल र मलेसियामा समेत कार्यक्रम आयोजना गरिसकेको छ। सन् २०१७ देखि ‘गजल मुशायरा लाइभ’मार्फत डिजिटल माध्यमबाट विभिन्न देशमा रहेका नेपाली गजल सर्जकलाई समेत प्रस्तुत गर्दै आएको छ।
क्यानबेरामा सम्पन्न ‘गजल मुशायरा–२०२६’मा सहभागी गजलकार, गायक तथा संगीतकर्मी, दर्शक–श्रोता, स्वयंसेवक, प्रायोजक, सहयोगी संस्था तथा नेपाली समुदायप्रति मुशायरा परिवारले आभार व्यक्त गरेको छ।
Discussion about this post