इटहरी : यही बैशाख ३० गते हुने स्थानीय तहको निर्वाचनमा नेपाली कांग्रेस सुनसरीका जिल्ला सभापति केदार भण्डारी इनरुवा नगरपालिकाको मेयरका उम्मेदवार छन् ।
सादगी जीवनशैलीका भण्डारी कांग्रेसको १४ औँ महाधिवेशनमा सुनसरी सभापतिमा विजयी भएका हुन् । अहिले इनरुवा नगरपालिकाको मेयरका उम्मेदवार रहेका भण्डारीले यहाँ गठबन्धन बिनै चुनाव जितिने बताउँदै आएका छन् ।
विं.सं २०१४ सालमा जन्मिएका भण्डारी सुनसरीकै लोकप्रिय नेताका रूपमा परिचित छन् ।
नेतृत्व रहरले होइन, जिम्मेवारीबोधले लिनुपर्छ, पद मानका लागि होइन, योगदानको लागि हुनुपर्छ भन्ने उदेश्यले आफू राजनीतिमा आएको उनको तर्क छ ।
लोकतन्त्रप्रतिको अटुट आस्था र सरल राजनीतिक जीवनशैली, कानूनशास्त्रमा स्नातक गरेका भण्डारी भन्छन्, ‘विपक्षी दलहरूमा पराजित मानसिकता देखिन थालेपछि कांग्रेस मुस्लिम समुदाय विरुद्ध छ भनेर अफवाह फैलाइयो ।’
जननेता वीपी कोइराला तथा नेपाली राजनीतिका क्रान्तिनायक गिरिजाप्रसाद कोइरालाको राजनीतिक विरासत धान्ने थलो सुनसरीमा कांग्रेसको राजनीति कमजोर हुन नदिने भण्डारीको प्रतिबद्धता छ ।
२०५४ सालमा नेपाल बार एसोसिएसन सुनसरीको अध्यक्ष, २०५६ मा प्रजातान्त्रिक कानून–व्यवसायी सङ्घ (डिएलए) को केन्द्रीय उपाध्यक्ष, २०६० नेपाल बार एसोसिएसनको केन्द्रीय उपाध्यक्ष, २०६३ मा नेपाली कांग्रेस सुन्सरीको जिल्ला सदस्य तथा २०६७ मा कांग्रेस सुनसरीको निर्वाचित जिल्ला सचिव भई नेतृत्व क्षमता स्थापित गरेका भण्डारी हाल जिल्ला सभापति छन् ।
युवा जमातलाई मूलधारको राजनीतिमा ल्याउने र उचित जिम्मेवारीका साथ नेतृत्वमा पु¥याउने आफ्नो लक्ष्य रहेको उनको योजना छ ।
‘मैले नेतृत्व गर्ने अवसर पाए जिल्ला समितिमा ६० प्रतिशत युवाको सहभागिता सुनिश्चित गराउँछु,’ भण्डारी भन्छन्, ‘अग्रजलाई उचित सम्मान दिने र नयाँलाई अवसर दिने मेरो योजना छ ।’
उनले इनरुवालाई कृषि नगरको रुपमा विकास गदै यहाँका कृषकहरूलाई १२ महिनै मल र बीउ उपलब्ध गराउने आफ्नो कार्य योजना रहेको बताए । साथै कृषकहरूलाई आवश्यक सिँचाइको समस्यालाई दीर्घकालीन रुपमा समाधान गर्ने आफ्नो योजना रहेको बताउँदै भण्डारीले इनरुवामा सुविधा सम्पन्न नगर अस्पताल र कलेज बनाउने समेरहेको उनको भनाइ छ ।
‘विपक्षी दलले जातीय फन्डा निकालेर मतदातामा फाटो ल्याउन खोजे’
इनरुवामा विपक्षी दलले कांग्रेसमाझ जातीय फन्डा झिकेर फाटो ल्याउन खोजेको भन्दै त्यस्ता भ्रममा नपर्न उनको आग्रह छ । विपक्षी दलले मुस्लिम समुदायमाथि निराधार हल्ला फिजाएर जातीय सदभाव खलल हुने किसिमका अभिव्यक्ति दिने गरको प्रति उनले सचेत गराए ।
इनरुवाको स्थानीय तहमा कांग्रेसले मुस्लिम समुदायलाई समेत समेटेर उम्मेदवार बनाएको बताउँदै भण्डारीले कांग्रेस जातीय एकतामा सदैव विश्वास गर्ने पार्टी भएको बताए ।
Discussion about this post