प्रदेश १ को प्रदेश सभा बैठक माघ २५ गतेका लागि बोलाइएको छ । बैठक माघ ७ गते ५ मिनेट बसेर अनिश्चित कालका लागि स्थगित गरिएको थियो ।
अर्को बैठक माघ २५ गते दिउँसो २ बजे बस्ने प्रदेशसभा सचिवालयले एक सूचना जारी गरेर जानकारी दिएको छ । प्रदेशसभा सचिव गोपाल पराजुलीले सभामुख प्रदीपकुमार भण्डारीले बैठक आह्वान गरेको जानकारी दिएका छन् ।
प्रधानमन्त्री केपी शर्मा ओलीले संसद विघटन गरेसँगै उनी पक्षीय प्रदेश १ का मुख्यमन्त्री शेरधन राईविरुद्ध अविश्वासको प्रस्ताव दर्ता भएको छ ।
नेकपाको पुष्पकमल दाहाल ‘प्रचण्ड’ र माधवकुमार नेपाल समूहले राईविरुद्ध अविश्वास प्रस्ताव दर्ता गर्दै उनलाई संसदीय दलको नेताबाट समेत हटाइएको छ ।
मुख्यमन्त्री राईले पनि आफूविरुद्ध अविश्वासको प्रस्ताव दर्ता गर्ने १६ सांसदलाई निलम्बन गरिसकेका छन् । त्यो अवस्थामा यसअघि माघ ७ मा बोलाइएको बैठक प्रदेश प्रमुख सोमनाथ अधिकारी ‘प्यासी’को पत्र पढेर सुनाएपछि सभामुख भण्डारीले स्थगित गरेका थिए ।
प्रदेशसभामा सरकारले अहिलेसम्म कुनै पनि विधेयक दर्ता गरेको छैन । त्यही भएकाले आगामी बैठकमा अविश्वास प्रस्तावको छलफलबाहेक अरु कुनै विषय अगाडि नबढ्ने बताइएको छ ।
Discussion about this post