मोरङ (जेफाले) : मोरङको कर्णाली भनेर चिनिने जेफालेमा सिर्जना उत्सव भव्यताका साथ सम्पन्न भएको छ । नयाँ वर्षको अवसरमा केराबारी गाउँपालिका वडा नं. २ को आयोजना तथा जेफाले सिर्जना डबलीको संयोजन तथा व्यवस्थापनमा सिर्जना उत्सव सम्पन्न भएको हो ।
कार्यक्रममा सात कवि तथा सात गजलकारहरुले सिर्जना सुनाएका थिए । त्यस्तै, पर्यटन र साहित्य सम्बन्धित बहस समेत आयोजना गरिएको थियो ।
पहिलो चरणमा ‘पर्यटन साहित्य किन र के का लागि’ विषयक बहस गरिएको थियो । कवि राज माङ्लाक, केराबारी गाउँपालिकाकी उपप्रमुख शान्ति भुजेल र पर्यटनकर्मी डिल्लिराम शर्मा अधिकारीले बहस गरेका थिए भने युवराज ठकुरी अज्ञानीले सहजीकरण गरेका थिए ।
कवि माङ्लाकले साहित्यको माध्यमबाट जेफालेलाई पर्यटन हबको रुपमा विकास गर्नका लागि गरेको नौलो अभ्यास सकारात्मक रहेको बताए । उनले भने, ‘पर्यटनको रुपमा पनि विकास गर्नका लागि साहित्यिक उत्सवका कार्यक्रमको सुरुआत हुनु राम्रो पक्ष हो, नेपालमा पर्यटनका थुप्रै सम्भावनाहरु छन्, तर हामीले एउटा यात्रा संस्मरण समेत लेख्न नसक्दा पर्यटनको विकास हुन सकेको छैन ।’
नेपालले हिमालको कथा बेचेर बाँच्न सक्ने भएपनि लेख्न नसकिएको र यात्राका संस्मरण समेत लेख्न नसक्नु दुःखद् रहेको उनले बताए ।
पर्यटनकर्मी अधिकारीले राज्यले समुचित ढंगबाट विकास गर्नुपर्ने बताए । राज्यले पर्यटनको विकासका निम्ति आवश्यक नीति निर्माण नबनाएको र लगानी समेत नगरेकाले समस्या भएको बताए ।
‘हामीले देशको हावा बेचेर पनि पैसा कमाउन सक्छौ, त्यति धेरै सम्भावना छन्,’ उनले भने, ‘नेपाल सौन्दर्यताको देश छ, पर्यटनलाई जनस्तरसमक्ष पुर्याउन अझै धेरै काम बाँकी छ ।’
बहस कार्यक्रममा गाउँपालिकाकी उपाध्यक्ष भुजेलले जेफाले मोरङको कुनामा लुकेको ठाउँ रहेको उल्लेख गर्दै यसलाई साहित्य र पर्यटनमार्फत चिनाउन गरिएको अभ्यास सराहनीय रहेको बताईन् ।
‘गाउँपालिकाबाट पर्यटनको लागि स्थानीयले जति अपेक्षा गरेका छन्, त्यति सम्बोधन हुन नसकेको अवस्था छ, आगामी दिनमा साहित्य र पर्यटनको श्रीबृद्धिका लागि हामी नीति निर्माणमा लागि पर्नेछौँ ।’ उनले भनिन् ।
सिर्जना डबलीका सञ्चालक तथा बहस कार्यक्रमका सहजकर्ता युवराज ठकुरी अज्ञानीले पर्यटन र साहित्यलाई सँगै लैजान सकेमा समृद्धि हुने बताए । उनले साहित्यको माध्यमबाट उक्त ठाउँलाई सकारात्मक रुपमा अघि बढाउनका निम्ति साहित्य सँगसँगै पर्यटनलाई जोडेको बताए ।
कार्यक्रमको दोस्रो सेसनमा ‘हाम्रै जनजीवनका कवि र कविता’ शीर्षकमा सात कविले कविता सुनाएका थिए । कविहरु मनु मञ्जिल, बद्री भिखारी, मुकुन्द प्रयास, रोशन परियार, विवेक विवश रेग्मी, सबिता फागो र नवीन थापा क्षत्रीले एक–एक वटा कविता सुनाएका थिए ।
त्यस्तै, ‘दामी गजल’ शीर्षकमा सात गजलकारले गजल सुनाए । गजलकारहरु लोकेन्द्र बञ्जारा, कृष्ण काश्यप, जेबी थुलुङ, दीपा वाग्ले, विश्वजीत राई, तारा दिप्साली राई र शुक्र आङ्देम्बेले गजल सुनाएका थिए । गजल कार्यक्रमलाई अस्मिता भट्टराईले सहजीकरण गरेकी थिईन् ।
सोही कार्यक्रममा गीतकार गोबिन्द खड्काको गीत संग्रह समेत बिमोचन गरिएको थियो ।
कार्यक्रममा केराबारी गाउँपालिकाका अध्यक्ष रोहितबहादुर कार्कीले जेफालेलाई पर्यटनको माध्यमबाट विकास गरिने बताए । पर्यटन र साहित्य सँगसँगै लैजानु अपरिहार्य काम रहेको उनले बताए ।
कार्यक्रममा वडासचिव रत्न बुढाथोकी (रञ्जित) ले स्वागत मंतव्य राखेका थिए ।
Discussion about this post