इटहरी (डेस्क) : प्रदेश १ का तीन जिल्लामा एकैदिन तीन महिलाको शव फेला परेको छ । प्रदेश १ प्रहरी कार्यालय विराटनगरका अनुसार मोरङ, झापा र इलाममा गरी तीन जना महिला सोमबार मृत भेटिएका हुन् ।
प्रहरीका अनुसार मोरङको सुन्दरहरैँचा नगरपालिका ७ की २४ वर्षीया छेविनी ऋषिदेव, झापाको विर्तामोड नगरपालिका ५ की २६ वर्षीया सृजना बस्नेत र उच्च अदालत विराटनगर इलाम इजलासमा कार्यरत ४८ वर्षीया विमला पराजुली मृत भेटिएका हुन् ।
तीन जनाको मृत्यु शंकास्पद छ । मोरङकी २४ वर्षीय ऋषिदेव घर नजिकैको गछिया खोलामा अर्धनग्न अवस्थामा फेला परेकी हुन् । झापा विर्तामोडकी २६ वर्षीय बस्नेत पनि कोठा अगाडिको सडकमा अर्धनग्न अवस्थामा फेला परेकी हुन् ।
४८ वर्षीय पराजुलीको शव कार्यालय परिसरमा घोप्टो परेको अवस्थामा प्रहरीले फेला पारेको थियो ।
प्रहरीका अनुसार मृतकहरु सबैको घटना शङ्कास्पद भएकाले अनुसन्धान सुरु गरिएको प्रहरीले जनाएको छ । घटनाको अनुसन्धानका लागि प्रहरीले तालिमप्राप्त कुकुर समेत परिचालन गरेको जनाएको छ ।
Discussion about this post