मोरङ : मोरङमा छोरी जन्मिएकै कारण नवजात शिशुको हत्या गरेको अभियोगमा आमासहित परिवारका चारजनालाई प्रहरीले पक्राउ गरेको छ।
प्रदेश १ प्रहरी कार्यालय विराटनगरका अनुसार जेठ २७ गते मोरङको रंगेली नगरपालिका ५ की २५ वर्षीया खुस्वु मण्डलले छोरी जन्माएकी थिइन्। तर, उनले शिशुलाई ब्ल्याङकेटले घाँटी थिचेर हत्या गरेको र उनका बुवाले संचालन गरेको रंगेली ५ स्थित चाँदनी चोकमा रहेको मदिरा पसलभित्र खाल्डो खनेर गाडेको पुष्टि भएको थियो ।
यसअघि नै उनका तीन जना छोरी छन् । प्रहरीका अनुसार घरमै छोरी जन्माएपछि खुस्बुले ब्ल्यान्केटले बेरिन् । श्रीमानले स्वीकार नगर्ने बताएपछि बेरेकै ब्ल्यान्केटले थिचेर हत्या गरिन् ।
हत्यापछि करिब पाँच सय मिटर टाढा आमा–बुवाले सञ्चालन गर्दै मदिरा पसलमा ल्याएर गाडेको प्रहरीले बताएको छ । शिशुको शव गाड्न खुस्बु, उनका श्रीमान र आमाबुबा खटिएका थिए ।
घटनामा संलग्न रहेको अभियोगमा खुस्वुका श्रीमान २८ वर्षीय अरुण मण्डल, बुवा ५० वर्षीय नागेश्वर मण्डल, आमा ४८ वर्षीया उर्मिला मण्डल पक्राउ परेका हुन्।
हत्याको सूचनापछि मंगलबार प्रहरीले चारै जनालाई पक्राउ गरेको हो । उनीहरूविरुद्ध कर्तब्य ज्यानको मुद्दामा मोरङ जिल्ला अदालतबाट ५ दिन म्याद थप गरी अनुसन्धान अगाडि बढाएको प्रहरीले जनाएको छ।
Discussion about this post