मोरङ : मोरङबाट एक महिना तीन साताको अवधिमा ५२ जना फरार प्रतिवादीलाई प्रहरीले पक्राउ गरेको छ ।
विभिन्न अपराधिक घटनामा अदालतले दोषी ठहर गरे पनि फरार रहेकाहरुलाई पक्राउ गरिएको मोरङ प्रहरीका प्रवक्ता डीएसपी दीपक श्रेष्ठले बताए ।
उनका अनुसार फरार प्रतिवादी पक्राउ गर्न विशेष अभियान चलाइएको छ । असार २० गतेदेखि हालसम्म ५२ जनालाई पक्राउ गरेर अदालतमा बुझाइएको उनको भनाइ छ ।
फरार रहेका प्रतिवादीलाई प्रहरीले बुझाएपछि अदालतले कैद सजाय भुक्तानका लागि कारागार चलान गर्ने गरेको छ । जरिवाना मात्रै गरिएकाहरुलाई भने रकम असुल गरेर छाडिएको छ ।
जिल्ला अदालत मोरङका सूचना अधिकारी राजेन्द्रप्रसाद धमलाका अनुसार अहिलेसम्म अदालतबाट भएको फैसला अनुसार धेरै वर्ष कैद र जरिवाना असुल हुन बाँकी छ । चार हजार सात सय ५८ वर्ष चार महिना तीन दिन कैद र २४ करोड ८८ लाख ४४ हजार सात सय ५५ रूपैयाँ जरिबाना असुल गर्न बाँकी रहेको उनले बताए ।
Discussion about this post