धरान : धरान उपमहानगरपालिकाको निर्देशन उल्लंघन गर्दै धरानका निजी विद्यालय तथा कलेजहरुले विद्यार्थीको भौतिक उपस्थितिमै पठनपाठन सञ्चालन गरिरहेको पाइएको छ ।
मङ्गलबार धरानका विभिन्न विद्यालय तथा कलेजहरुमा अनुगमन गर्दा उपमहानगरपालिकाको निदेर्शन विपरीत भौतिक उपस्थितिमै पठनपाठन सञ्चालन गरिरहेको पाइएको हो ।
धरान उपमहानगरपालिकाका शिक्षा, यूवा तथा खेलकुद महाशाखा अधिकृत मनोज भट्टराई, नगर प्रमुखका स्वकीय सचिव राजेशमान श्रेष्ठ, बजार अनुगमन अधिकृत वेदप्रसाद सापकोटा, नगर प्रहरी निरीक्षक विष्णु कोइराला सहितको टोली निजी विद्यालय तथा कलेज अनुगमन गर्न गएका थिए ।
मेयर तिलक राईको अध्यक्षतामा गएको भदौ ३१ गते बसेको कार्यपालिकाको बैठकले धरानमा कोरोना महामारी अझै नियन्त्रण हुन नसकेको भन्दै तिहारपछि मात्र विद्यालय तथा कलेजहरु खुलाउने निर्णय गरेको थियो ।
अधिकृत मनोज भट्टराईले आज धरानका चार वटा निजी स्कूल तथा कलेजहरुमा गएर अनुगमन गरिएको जानकारी दिए । उनका अनुसार विष्णु मेमोरियल, समिट सेकेन्डरी स्कूल, धरान आदर्श र यूरिका स्कुलमा अनुगमन गरिएको हो । अनुगमनका क्रममा विष्णु मेमोरियलमा विद्यार्थीको भौतिक उपस्थितिमै पठनपाठन सञ्चालन भइरहेको उनले बताए ।
बिहानको सिफ्टमा कक्षा ११ र १२ को भौतिक उपस्थितिमा पठनपाठन सञ्चालन गरिएको विष्णु मेमोरियलले स्वीकार गरेको छ । यस्तै, समिट स्कूलले पनि नर्सरी र यूकेजीको विद्यार्थीलाई दिउँसोको सिफ्टमा भौतिक उपस्थितिमै पठनपाठन सञ्चालन गरिरहेको भेटिएको थियो । अनुगमनका क्रममा धरान आदर्शमा भने कक्षा ११ र १२ को परीक्षा सञ्चालन भइरहेको भेटिएको थियो ।
अधिकृत भट्टराईका अनुसार यूरिका स्कूलमा भने पठनपाठन भएको देखिएको थिएन । ‘अनुगमनलाई निरन्तरता दिनेछौं, भोलि पनि अनुगमनमा जान्छौं, कडाईका साथ अनुगमन गर्छौँ, नगरपालिकाको निर्देशन विपरीत विद्यालय तथा कलेजहरुमा पठनपाठन भइरहेको पाइएमा कारबाही पनि गर्छौ,’ अधिकृत भट्टराईले भने ।
उपमहानगरपालिकाको शिक्षा, यूवा तथा खेलकुद महाशाखाले धरानमा विद्यालयहरुमा विद्यार्थीको भौतिक उपस्थितिमा पठनपाठन सञ्चालन गरेको पाइएमा प्रचलित कानून अनुसार कारबाही गरिने विज्ञप्तिमा उल्लेख छ । उपमहानगरपालिकाले भौतिक रुपमा विद्यालय सञ्चालन नगरी वैकल्पिक प्रणालीबाट विद्यार्थी सिकाई सहजीकरण कार्यलाई निरन्तर अगाडि बढाउन निर्देशन दिएका थिए ।
Discussion about this post