‘व्यवहार मिलाउन’ भन्दै घरबाट हिँडेका व्यक्ति मोरङमा मृत फेला, यस्तो छ घटना योजनाबद्ध

मोरङ : मोरङमा खाल्डोमा पुरिएको अवस्थामा अर्को शव भेटिएको छ । मोरङ धनपालथान गाउँपालिका ७ कमलपुरको बस्ती नजिकको उखुबारीको खाल्डोमा शव भेटिएको हो ।

उखुबारीमा रहेका दुई खाल्डो मध्ये एउटामा बुधबार शव भेटिएको थियो भने अर्को खाल्डो बिहीबार उत्खनन गर्ने क्रममा शव भेटिएको मोरङ प्रहरीले जनाएको छ । बुधबार पुरुषको शव भेटिएको स्थान नजिकै अर्को शङ्कास्पद खाल्डो भेटिएको थियो ।

मोरङको धनपालथान ७ मा रहेको उखुबारीमा गाडेको अवस्थामा मृत भेटिएका राजेन्द्रकुमार श्रेष्ठ जग्गा कारोबारी भएको खुलेको छ ।

भक्तपुर बस्दै आएका उनी मङ्सिर ४ गते घरबाट हिँडेका थिए । तर पछिल्लो समय कारोबार बिग्रिएपछि उनी ‘व्यवहार मिलाउन’ भन्दै घरबाट हिँडेका थिए । त्यपछि उनी भक्तपुर फर्किएनन् ।

उनकी श्रीमती, २५ र २६ वर्षका दुई छोरा र ११ वर्षीया छोरी छन् ।

२५ वर्षअघि धरानमा सुन पसल सञ्चालन गरेका उनको अहिले झापामा प्लटिङ पनि छ । खाल्डो उत्खननका लागि जिल्ला प्रहरी कार्यालय मोरङका प्रहरी उपरीक्षक जनार्दन जिसी सहितको टोली घटनास्थलतर्फ पुगेको थियो । अहिले संघीय प्रहरी इकाई कार्यालय धरानबाट तालिमप्राप्त कुकुरसहितको अनुसन्धान टोली पनि घटनास्थलमा पुगेको छ ।

सोही ठाउँदेखि ३० मिटर पूर्व उखुबारीमा बुधबार भेटिएको अर्का एक पुरुषको शवको पहिचान खुल्न बाँकी छ । दुवै जनालाई हत्या गरेर करिब ६ फिट गहिरो खाडल खनेर गाडेको प्रहरीको प्रारम्भिक अनुसन्धानबाट देखिएको छ ।

यस्तो छ घटना योजनाबद्ध

प्रहरी स्रोतका अनुसार अपराध भएको स्थान र शव गाडेको स्थान फरक फरक भएको बताइएको छ । अनुसन्धानमा संलग्न एक प्रहरी अधिकृतले भने ‘अन्य स्थानमा हत्या गरेर यहाँ खाडल खनेर गाडेको अवस्था छ ।’ ‘केही क्लु खुल्दै छ अनुसन्धान अगाडि बढिसकेको अवस्था छ ।’

बिहीबार भेटिएको श्रेष्ठको शवको घाँटीमा डोरीले बाँधेको डाम देखिएको बताइएको छ । यस्तै खाडलमा शव हालेपछि माथिबाट नुन समेत प्रयोग गरिएको कारण घटना योजनाबद्ध हुन सक्ने प्रहरीको अनुमान छ । शव बेर्न प्लास्टिकको समेत प्रयोग भएको छ । बुधबार बरामद भएको शवलाई भने बोरा भित्र हालेर गाडिएको छ ।

श्रेष्ठ भक्तपुरको लोकनथलीमा बस्ने गर्दथे । उनको आफन्त मात्र धरानमा रहेको प्रहरी स्रोतले जनाएको छ । जग्गा कारोबारी गर्ने उनी झापा जान्छु भनी ४५ दिनअघि घरबाट हिँडेको बताइएको छ । उनको धरान र भक्तपुरमा रहेका आफन्त प्रहरी सम्पर्कमा आएका छन् ।

घटनाबारे थप अनुसन्धान भइरहेको प्रहरीले जनाएको छ ।