धरान : धरान उपमहानगरपालिकाको १० औं नगरसभा भोलि (शुक्रबार) हुने भएको छ ।
विपी प्रतिष्ठानको अडोटेरिएम हलमा शुक्रबार बिहान १० बजेदेखि नगरसभा सुरु हुने नगर प्रमुख तिलक राईको अध्यक्षतामा आज बसेको कार्यपालिकाको बैठकले जानकारी दिएको हो ।
चालू आर्थिक वर्षको नवौं कार्यपालिकाको बैठकले उपमहानगरपालिकाको नवौं नगर सभाबाट स्वीकृत आर्थिक ऐन २०७८ को दफा १७ मा भएको छुट सम्बन्धी व्यवस्थाको १ को ४ मा संशोधन गरी नगरपालिकामा दाखिला गर्न बाँकी बहाल कर गत असोज मसान्तसम्म जारिवाना छुट दिने भनिएकोमा आगामी चैत्र मसान्तसम्म जरिवाना छुट हुने व्यवस्था गरि १० औं नगर सभामा प्रस्ताव पेश गरिने जनाएको छ ।
यस्तै, नवौं नगरसभाबाट स्वीकृत विनियोजन ऐन २०७८ मा चालू आर्थिक वर्षका लागि अनुमान गरेको आन्तरिक आय अनुमानको तुलनामा संकलन न्यून भएको र अनुमान गरेका जति संकलन हुने सम्भावना नरहेकोले आन्तरिक आयबाट खर्च हुने गरी स्वीकृत गरिएका कार्यक्रम तथा योजनाहरुमा १० प्रतिशत घटाएर नगर सभामा पेश गरिने निर्णय गरिएको छ ।
नेपालको संविधान तथा स्थानीय सरकार संचालन ऐन २०७४ अनुसार स्थानीय तहहरुलाई प्रदान गरिएको आधारभूत तथा माध्यमिक शिक्षा लगायत शैक्षिक कार्यक्रमहरुको व्यवस्थापन तथा संचालन गर्न आवश्यक शिक्षा ऐनको मस्यौदा कार्यालयबाट तयार भई कानून मस्यौदा समितिबाट समेत सिफारिश भई आएको शिक्षा विधेयक २०७८ लाई स्वीकृतगरि नगर सभामा पेश गरिने निर्णय भएको छ ।
यस्तै, बैठकले सार्वजनिक सुनुवाई कार्यविधि २०७८ स्वीकृत, पदाधिकारीहरूको आचार संहिता २०७८ स्वीकृत, सार्वजनिक नीजि साझेदारी विधेयक २०७८ नगर सभामा पेश गरिने निर्णय गरेको छ ।
Discussion about this post