इटहरी : मानिसको दैनिक जीवनमा आइपर्ने विपद् एवं प्रकोप र त्यसबाट जोगिने उपायबारे विद्यार्थीहरूलाई जानकारी दिदैँ एकदिने विपद् जोखिम न्यूनीकरण सम्बन्धि सचेतना कार्यक्रमको आयोजना गरिएको छ ।
बुधबार (आज) इटहरी ६ मा रहेको मोर्डन प्रिपेरेटोरी सेकेण्डरी बोर्डिंङ्ग स्कुलमा रहेको मोडर्न बाल क्लबको आयोजनामा विद्यालयमा अध्ययनरत एकसय जना भन्दा बढी विद्यार्थीहरूलाई प्रकोप तथा विपद्बाट जोगिने उपायहरुबारे जानकारी गराइएको हो ।
सशस्त्र प्रहरी बल नम्बर १, बराह बाहिनी पकलीले सहजीकरण गरेको उक्त कार्यक्रममा सशस्त्र प्रहरी बलका प्रदेश स्तरीय विपद् व्यवस्थापन टिमका कमान्डर डीएसपी वीरेन्द्र खनालले प्राकृतिक, मानवीय कमजोरीका कारणले आइपर्ने विपद् एवम् प्रकोपबाट जोगिने उपायबारे विद्यार्थीहरूलाई प्रशिक्षण दिएका थिए ।
कुनैपनि प्रकोप वा विपद्ले पूर्व सूचना दिएर नआउने बताउँदै आईपर्ने दुर्घटनाबाट बच्न विपद् व्यवस्थापन र क्षति न्यूनीकरणबारे चेतना र पूर्व तयारी अत्यावश्यक रहेको बताए ।
उनले भने, ‘विपद्बाट बच्न पहिलो कुरा समुदायको चेतनाको स्तर बढाउनुपर्छ, सम्भावित जोखिम न्यूनीकरणका लागि पूर्व तयारी गर्नुपर्छ । त्यसका लागि विद्यालयस्तरबाटै विद्यार्थीहरूलाई जोखिम न्यूनीकरणका उपाय सिकाउन सके समुदाय स्तरमा जोखिम न्यूनीकरणमा सहयोग पुग्छ ।’
भूकम्प, बाढी, आगलागीको जोखिम हामीकहाँ उच्च रहेको बताउँदै उनले भने, ‘पूर्व तयारीको अभाव र समुदायस्तरमा चेतनाको कमीले हरेक वर्ष मानवीय तथा भौतिक क्षति हुँदै आएको छ ।’
विद्यालय सञ्चालक समितिका अध्यक्ष सञ्जीव वाग्लेले सचेतनामुलक प्रशिक्षणले कार्यक्रमले विद्यार्थीलाई पाठ्यपुस्तकमा पढ्नुपर्ने विपद् सम्बन्धि विषयहरूमा अझ जागरुक र सचेत बनाउने बताउँदै समाजमा आइपर्ने विभिन्न प्रकोप एवम् विपद व्यवस्थापन, न्यूनीकरणमा योगदान गर्ने बताए ।
समाज जोखिम न्यूनीकरणमा जति सचेत हुन्छ प्रकोपबाट हुने क्षति त्यति नै कम हुने बताउँदै वाग्लेले भने, ‘विपद् न्यूनीकरणको लागि विपद् व्यवस्थापन सम्बन्धि चेतनाले धेरै महत्वपूर्ण भूमिका निर्वाह गर्छ । त्यसका लागि किशोर किशोरी अवस्थाबाटै दिईने यस्ता प्रशिक्षणहरूले समाजमा आइपर्ने विपद्को सम्भावित जोखिम कम गर्न मद्दत गर्छ ।’
विद्यालयका प्रधानाध्यापक भीमबहादुर श्रेष्ठले कार्यक्रममा सहभागी बालबालिकाले विपद्बाट जोगिने विषयमा राम्रो जानकारी पाएको बताउँदै यस्ता कार्यक्रमले सम्भावित क्षति न्यूनीकरणका लागि चेतनशील समाज निर्माणमा समेत महत्वपूर्ण योगदान हुने बताए ।
यो पनि – इटहरीको मोर्डन प्रिपेरेटरी स्कुलमा साइबर अपराधबारे सचेतना, के भन्छन् डीएसपी ?
Discussion about this post