धरान : धरान उपमहानगरपालिकामा स्वतन्त्र उम्मेदवार हर्क साम्पाङ विजयी भएका छन् । दुई ठूला दल नेपाली कांग्रेस, नेकपा एमालेलाई पछि पार्दै साम्पाङले अनपेक्षित जीत निकालेका हुन् ।
पाँचदलीय गठबन्धन र नेकपा एमालेले हलुका रूपमा लिएका साम्पाङले अनपेक्षित जीत निकालेका हुन् ।
निर्वाचन अधिकृतको कार्यालय धरानले दिएको जानकारी अनुसार साम्पाङले कुल २० हजार ८२१ मत प्राप्त गरे ।
यस्तै, गठबन्धनबाट नेपाली कांग्रेसका किशोर राईले १६ हजार ५९ मत प्राप्त गरे । राई यसपटक चुनाव जित्नेमा ढुक्क थिए । माओबादी केन्द्र र नेकपा एसको साथ पाएका उनले यसपटक धरानमा आफूले बाजी मार्ने बताउँदै आएका थिए । तर, साम्पाङ अपत्यारिलो गरी विजयी भएका छन् ।
नेकपा एमालेको गढ मानिएको धरानमा यसपटक भने एमाले तेस्रो बनेको छ । एमालेकी मञ्जु भण्डारीले कुल १२ हजार ८२५ मत प्राप्त गरिन् । एमालेले धरानमा २०४९, २०५४ र २०७४ सालमा भएको स्थानीय निर्वाचनमा जितेको थियो । एमालेको ‘लालकिल्ला’ भनेर चिनिँदै आएको धरानमा २०७६ सालमा भएको उपनिर्वाचनमा कांग्रेसका तिलक राईले मेयरमा बाजी मारेका थिए ।
यस्तै, उपमेयरमा गठबन्धनको तर्फबाट माओबादी केन्द्रका आइन्द्रविक्रम बेघा निर्वाचित भएका छन् । बेघाले २० हजार ५१० मत प्राप्त गर्दा नेकपा एमालेका पदम लिम्बूले १७ हजार ६०६ मत प्राप्त गरे ।
चुनावताका मत माग्न ठूलो हुलहुज्जत नगरी जनताको घरदैलोमा पुगेका उनलाई धरानले जनताले रुचाएका छन् । चुनाव प्रचारप्रसारमा पनि एक्लै हिँडेका उनलाई धराने जनताले काम गर्ने अवसर दिएका हुन् ।
Discussion about this post