इनरुवा : सुनसरीको इनरुवा नगरपालिकाका मेयर केदार भण्डारीले सपिङ कम्प्लेक्स निर्माणको सम्झौता गरेमा आफूलाई दुई करोड रुपैयाँ दिने भन्दै अफर आएको खुलासा गरेका छन् ।
शनिबार इनरुवाको हार्डवेयर व्यवासयी संघको दोस्रो साधारणसभामा सम्बोधन गर्ने क्रममा मेयर भण्डारीले सपिङ कम्प्लेक्स निर्माणका लागि सम्झौता गरेवापत दुई करोड रुपैयाँ दिने भन्दै प्रस्ताव आएको खुलासा गरेका हुन् ।
उनले भने, ‘निर्माणका काममा ठूलो चलखेल हुँदो रहेछ, मलाई पनि यस्तै प्रलोभन दिइयो, कम्प्लेक्स निर्माणका लागि सम्झौता गरेर काम अगाडि बढाउन दिए दुई करोड दिने अफर आयो ।’
उनले आफूलाई कमिसनको अफर गर्ने ठेकेदारको नाम तत्काल नखुलाउने बताउँदै भने, ‘नक्सा डिजाइन गर्नेले रकम हात लगाइदिन्छौँ भनेका हुन्, मैले उनीहरूको अफर ठाडै अस्वीकार गरेँ ।’
नगर विकास कोषबाट बन्न लागेको कम्प्लेक्समा २० प्रतिशत नगरले व्यहोर्ने र बाँकी निर्माण गर्ने व्यवसायीले व्यहोर्नेगरी सम्झौता गर्नुपर्ने भएपनि आफूले अस्वीकार गरेको बताए ।
मेयर भण्डारीले भने, ‘नगरलाई आर्थिक भार बोकाएर कम्प्लेक्स बनाउनुभन्दा पार्किङयुक्त हरियाली पार्क बनाउनु उपयुक्त हुन्छ, २४ करोड ऋण बोकेर पाँच तले संरचना खडा गर्नुभन्दा नगर र नगरवासीका प्राथमिकताका विषय र आवश्यकता पहिचान गरी कार्यान्वयनमा ल्याउनु उचित हुने बुझेको छु ।’
यसअघि आफू मेयरमा निर्वाचित भएपश्चात् नगर विकास कोषका तर्फबाट कार्यकारी निर्देशक कृष्णप्रसाद सापकोटाको फोन आएको र सम्झौता कार्यान्वयनका लागि काठमाडौं आउन भनिएको बताए ।
सो क्रममा मेयर भण्डारीले कम्प्लेक्सको सन्दर्भमा आफू कुनै पनि निष्कर्षमा नपुगेको र वस्तुस्थिति बुझेर सर्वपक्षीय रायपश्चात् मात्र जानकारी गराउने भनी जवाफ फर्काएको जानकारी गराए ।
सपिङ कम्प्लेक्स निर्माण प्रयोजनका लागि गत फागुनमा इनरुवा नगरपालिका र नगर विकास कोषबीच सम्झौता भएको थियो ।
नगरपालिकाका इन्जिनियर उमेश्वर मेहताका अनुसार तत्कालीन समयमा कोषका पदाधिकारीसहितको टोली नगरपालिकामा आएर छलफल गरी डिजाइनको प्रक्रिया अघि बढाइएको बताए ।
तत्कालीन नगरप्रमुख राजन मेहता र कोषका कार्यकारी निर्देशक सापकोटाले २४ करोड ऋण सम्झौतामा हस्ताक्षर गरेको बुझिएको छ ।
मेयर भण्डारीले स्रोत साधन जुटाएर स्थानीय क्षेत्रको पूर्वाधार विकासमा आफ्नो ध्यान जाने बताउँदै भने, ‘यहाँ कमिसनको खेला भयो, अब मेरो कार्यकालमा सार्वजनिक जग्गा मिचेर बसेकाहरूसँग पनि छलफल गरी सार्वजनिक जग्गा छुट्याउने काम हुन्छ ।’
उनले एक फरक प्रसङ्गमा इनरुवामा रहेको जिल्ला अस्पतालमा आफ्नो चासो रहेकाले यहाँका जनताले स्वास्थ्य क्षेत्रका लागि अन्य ठाउँ जान नपर्ने बताए ।
उनले भने, ‘जिल्ला अस्पताल व्यवस्थापन हुँदैछ, निश्चित करबाहेक अरु व्यापारीलाई मार्कामा पर्ने कर घट्नेछ ।’
उनले पछिल्लो समय इनरुवा क्षेत्रमा पार्किङ अस्तव्यस्त भएका कारण त्यसको दीर्घकालीन समाधानका निम्ति पनि आफू सकारात्मक रहेको बताए ।
Discussion about this post