सुन्दरहरैँचा : मोरङको सुन्दरहरैँचामा बचतकर्ताको रकम हिनामिना गर्ने सहकारीका एक जना कर्मचारीलाई प्रहरीले पक्राउ गरेको छ ।
मोरङ प्रहरीका प्रवक्ता डीएसपी दीपक श्रेष्ठका अनुसार पक्राउ पर्नेमा सुन्दरहरैँचा ७ गोठगाउँका २४ वर्षीय विवेक भुजेल रहेका छन् ।
उनी सुन्दरहरैँचा ६ स्थित कनकलक्ष्मी बचत तथा ऋण सहकारी संस्था लिमिटेडको गोठगाउँ सेवा केन्द्रका सहायक कर्मचारी हुन् ।
सहकारीका सचिव यमप्रसाद सिग्देलको जाहेरीका आधारमा पक्राउ गरेर उनीमाथि अनुसन्धान अघि बढाइएको डीएसपी श्रेष्ठले बताए । जम्मा गरेको रकम बचतकर्ताले आफ्नो खातामा नभएको थाहा पाएपछि सहकारीलाई गुनासो गरेका थिए ।
सहकारीले सचिव सिग्देलको संयोजकत्वमा तीन सदस्यीय समिति बनाएर छानबिन गरेको थियो ।
सहकारीका लेखा समिति संयोजक युवराज आचार्य र लेखा प्रमुख विराटचन्द्र पोखरेलसमेत सम्मिलित समितिले बचतकर्ताको ४६ लाख ८७ हजार नौ सय ८० रूपैयाँ सहकारीको काउन्टरमा कार्यरत भुजेलले हिनामिना गरेको पत्ता लगाएको हो ।
भुजेल २०७७ साल मंसिरदेखि सहकारीको कर्मचारीका रूपमा कार्यरत थिए । उनीविरुद्ध सहकारी ठगी कसूरमा कारबाही अघि बढाइने डीएसपी श्रेष्ठले जानकारी दिए ।
Discussion about this post