इटहरी (डेस्क) : २०७६ मङ्सिरमा घरेलु कामदारको लागि भनेर झापा अर्जुनधारा ७ डाँडागाउँकी ३२ वर्षीया जानुका सुवेदीलाई केही व्यक्तिले झुक्याएर भारतको दिल्ली पुर्याइएको बखत भारतीय नागरिक ४० वर्षीय जपाडिया नरेशकुमार बाबु भाइसँग जानुकाको दिल्लीमै चिनजान भयो ।
जानुकालाई त्यहाँ जबरजस्ती बन्धक बनाएर काममा लगाएको देखेपछि नरेशकुमारले उनलाई उद्धार गरेर नेपाल ल्याएका थिए । नरेशले उनलाई दिल्लीबाट नेपालसम्म उद्धार गरेर ल्याँउदा ठूलै जोखिम पनि मोलेका थिए ।
भारत गुजरातका तिनै नरेशकुमारको शव असार १२ गते साँझ अर्जुनधारा ४ स्थित स्थानीय खोलमा बोराभित्र हालेर फालेको अवस्थामा शव भेटियो । शुरुमा नरेशकुमारको सनाखत हुन सकेन । टाउको र शरीरका बिभिन्न भागमा चोट भेटिएपछि इलाका प्रहरी कार्यालय अनारामनीका डीएसपी रुगम कुँवर स्वयं घटनाको अनुसन्धानमा लागे ।
पहिचान खुल्न साथ शुरुमा नरेशकुमार बैशाख ४ गते अवैध ५९ हजार भारुसहित पक्राउ परेको प्रहरी रेकर्डमा भेटियो ।
राजश्व कार्यालय इटहरीमा प्रहरीले बुझाएपछि उनलाई धरौटीमा छाडेको थियो। तर, उनी तारेख धाउनुपर्ने भएका कारण नरेशकुमार असार ९ गते इटहरी आएर झापा पुगेको मोबाइल फोनको कल डिटेल्स (सिडिआर) रिपोर्ट देखियो । त्यसको केहीदिन अघि नरेश तिनै महिला जसलाई उनले भारतको दिल्लीबाट नेपाल उद्धार गरेर ल्याएका झापा अर्जुजधारा ७ डाँडागाउँकी ३२ वर्षीया जानुका सुवेदीको घरमा वास बसेको देखियो ।
तारेख धाउनुपर्ने भएपछि उनी जेठमा जानुकाको घरमा आएर तीनदिन बसेको अनुसन्धानबाट देखियो । उनी ७ असारमा पुनः जानुकाको घरमा आएर बसेका थिए।
मृतक नरेशकुमार र जानुकाबिच नजिकको सम्बन्ध भएको सिडिआरबाट देखिएपछि प्रहरीले जानुकामाथि अनुसन्धान केन्द्रित गर्यो । र अनुसन्धानको निष्कर्ष नरेशकुमारको हत्यामा जानुका उनका श्रीमान विनय भनिने वृखबहादुर थापा र सुनसरी बराहाक्षेत्र नगरपालिका १० का २५ वर्षीय सुरेश परियार संलग्न भएको भेटियो ।
नरेशकुमार, जसले जानुकालाई दिल्लीमा बन्धक बनाएर काममा लगाएको त्यो अवस्थाबाट उद्वार गरेर नेपाल ल्याए आज उनै जानुकाको योजनामा नरेशले ज्यान गुमाउन पुगे ।
अनारामनीका डीएसपी कुँवरले आइतबार हत्यामा संलग्न जानुका, उनका श्रीमान र सुरेश परियारलाई सार्वजनिक पछि भने ‘दुवैको दिल्लीबाटै चिनजान भएपछि, उनीहरू निकट भएकै कारण आर्थिक व्यवहार समेत भएको देखियो ।’
‘प्रहरीका अनुसार नरेशकुमारले जानुकालाई घर बनाउन आर्थिक सहयोगदेखि बालबच्चालाई कपडा समेत किनिदिन्थे । तर जानुकाका श्रीमान वृखबहादुरले दुवैको सम्बन्धमा शंका गर्दै आएका थिए । र घरमा पटकपटक विवाद समेत हुने गर्दथ्यो ।
यसको थप पुष्टि गदै जिल्ला प्रहरी कार्यालय झापाका एसपी विश्वमणि पोखरेलले पत्रकार सम्मेलनमा भने ‘असार ९ गते घरमै आएका नरेशकुमारले जानुकालाई हात समातेपछि श्रीमान् वृखबहादुर र नरेशबिच विवाद भएको थियो । तर त्यो दिन भने वृखबहादुरले हत्याको योजना पहिले नै बनाएर सुनसरीका सुरेश परियार र अर्को एक व्यक्तिलाई घरमा ल्याएका थिए ।’
नरेशकुमारको हत्या गरे वापत परियार र पहिचान नखुलाइएका एक व्यक्तिलाई पाँच लाखको ‘सुपारी’ दिने सहमती भएको एसपी पोखरेल बताउछन् ।
हत्यापछि परियारलाई दुई लाख र फरार व्यक्तिलाई एक लाखसमेत दिएको पाइयो पोखरेलले भने, ‘हत्यामा संलग्न अर्का एक व्यक्ति अझै फरार छन्।’ फरार व्यक्तिको प्रहरीले परिचय खुलाएको छैन।
हत्याको दिन नरेशकुमार, वृखबहादुर, सुरेश परियार र अर्को व्यक्तिले सँगै बसेर मापसे गरेको प्रहरी अनुसन्धानबाट खुलेको छ । सोही क्रममा विवाद हुँदा परियार र अर्का व्यक्तिले नरेशकुमारलाई मार्तल प्रहार र घाटी थिची हत्या गरेका थिए ।
पछि शव व्यवस्थापन गर्न बोरामा हालेर शव हत्या भएको स्थानदेखि ३ किलोमिटर पर अर्जुनधारा नगरपालिका ४ स्थित जुकेखाडी साहसी टोलको भित्री कच्ची सडकको खोलामा फालिएको थियो ।
– अपराध न्यूजको सहयोगमा
Discussion about this post