धरान : धरानमा बुधबारदेखि बजार अनुगमन सुरु गरिएको छ ।
इलाका प्रशासन कार्यालय धरानको अगुवाईमा धरान उपमहानगरपालिकाका राजश्व शाखा, कृषि शाखा, इलाका प्रहरी र नगर प्रहरी सहितको टोलीले संयुक्त रूपमा वडा नं. ३ स्थित माछाभौडी क्षेत्रमा अनुगमन गरिएको हो ।
उनीहरूले माछाभौडी बजार क्षेत्रमा रहेका भेटनेरी, किराना पसल, सुन पसल, माछामासु पसलको अनुगमन गरेका थिए । इलाका प्रशासन कार्यालयका प्रमुख चुडाराज भट्टराईले म्याद गुज्रेका, सडेगलेका, अखाद्यवस्तु बिक्री गर्दै आएका तथा बिना इजाजत व्यवसाय सञ्चालन गरिरहेकामाथि कडाइ सुरु गरिएको बताए ।
उनले धरान उपमहानगरपालिका र आन्तरिक राजश्व कार्यालयमार्फत सन्देशमुलक अनुगमन सुरु गरिएको जनाए । उनले किराना पसलमा म्याद गुज्रेको अखाद्य वस्तु, मासु पसलमा कुहिएको मासु बिक्री गर्न राखिएको भेटिएको बताए ।
म्याद गुज्रेको अखाद्य वस्तु र कुहिएको फाल्न लगाइएको उनले बताए । मासु अर्को पटक पनि अनुगमनको क्रममा म्याद गुज्रेका, सडेगलेका, अखाद्य वस्तु उपभोक्तालाई बिक्री वितरण गरेको पाइएमा प्रचलित कानूनअनुसार जरिवानासहित कारबाही गरिने भट्टराईले बताए ।
अनुगमनका क्रममा उपभोग्य मिति सकिएका खाद्य वस्तुलाई ‘एक्स्पायर जोन’ बनाएर राख्न, व्यवसाय दर्ता तथा मूल्यसूची उपभोक्ताले देखिने स्थानमा अनिवार्य टाँस गर्न निर्देशन दिइएको भट्टराईले बताए ।
Discussion about this post