इटहरी : राष्ट्रिय प्रजातन्त्र पार्टी नेपाल (राप्रपा नेपाल) का अध्यक्ष कमल थापाले प्रदेश खारेजीको अभियानसहित निर्वाचनमा सहभागी हुने बताएका छन् ।
(आज) मंगलबार इटहरीमा आयोजित प्रदेश १ स्तरीय प्रशिक्षण कार्यक्रमअघि पत्रकार सम्मेलन गर्दै थापाले मुलुकमा दुई तहको मात्रै सरकार आवश्यक रहेकाले प्रदेश खारेजीको अभियानसहित निर्वाचना होमिने बताएका हुन् ।
‘केन्द्रमा बलियो सरकार र स्थानीय तहमा अहिलेको भन्दा बढी अधिकार सम्पन्न गरी दुई तहको सरकार मात्रै कायम गर्नुपर्दछ,’ उनले प्रदेश संरचना खारेज गर्नुपर्ने बताउँदै भने, ‘प्रदेश तह खारेज गर्नुपर्दछ भन्ने अवधारणा जनसमुदायमा पु¥याउनुपर्छ, जनताबाट प्रत्यक्ष निर्वाचित प्रधानमन्त्री हुनुपर्छ ।’
प्रदेश खारेजीको माग राख्दैगर्दा प्रदेशसभामा राप्रपा नेपालको उपस्थिति हुन्छ कि हुँदैन भन्ने प्रश्नमा थापाले भने, ‘संविधान कायम रहन्जुलेसम्म प्रदेशसभा नमान्ने भन्ने हुँदैन, प्रदेशसभाको खारेजीको विषय उठाउँदै निर्वाचनमा सहभागी हुन्छौँ ।’
निर्वाचनमा तालमेल कुन दलसँग गर्ने निर्णय नभइसकेपनि विभिन्न राजनीतिक दलसँग छलफल चलिरहेको उनले बताए ।
‘एक्लै चुनाव जित्न कठीन हुन्छ, त्यसैले कुनै न कुनै पार्टीसँग तालमेल गर्नैपर्छ, तालमेल गर्दा जित्न सकिन्छ भने त्यसैसँग तालमेल गर्ने हो,’ उनले भने, ‘हाम्रो उदेश्य चुनाव जित्ने हो, शैद्वान्तिक, वैचारिक एलाइन्स भन्दापनि चुनाव जित्ने चैँ तालमेल हो ।’
उनले भने, ‘हाम्रो धेरै ठूलो आकांक्षा पनि छैन, केही सीमित ठाउँमा चुनावी तालमेल गर्छौँ, तालमेलका लागि नेकपा एमालेसँग छलफल भइरहेको छ, एमाले सकारात्मक छ ।’
हिन्दु राष्ट्र पुनःस्थापना, भ्रष्टाचार नियन्त्रण र बेरोजगारी निरुत्साहन आफूहरूको पार्टीको मुख्य योजना रहेको थापाले बताए ।
चुनावमा राप्रपा नेपालले ५ देखि १० सिट क्षेत्र पाउनेगरी तालमेल गर्ने उनको दाबी छ । उनले भने, ‘तालमेल नभएका क्षेत्रमा हाम्रो पार्टीले प्रतिनिधिसभा र प्रदेशसभामा उम्मेदवारी खडा गर्नेछ ।’
Discussion about this post