इटहरी : आगामी मंसिर ४ गते हुने प्रदेश तथा प्रतिनिधिसभा निर्वाचनको मिति नजिकिँदै जाँदा सुनसरी क्षेत्र नं. ३ को चुनावी माहौल गर्मिलो हुँदै गएको छ ।
नेकपा एमालेकी प्रभावशाली नेत्री भगवती चौधरीको पक्षमा उत्रिएको जनलहरले यसपटक सुनसरी ३ मा मतदाताले परिवर्तनको पक्षमा मत खसाल्ने बताइएको छ ।
३० वर्षयता एकै किसिमको राजनीतिक नेतृत्व भएको र विकासका काम सुस्त भएको भन्दै प्रतिनिधिसभा सदस्यकी उम्मेदवार चौधरीले सामाजिक र आर्थिक विकासका लागि आफूलाई जिताउनुपर्ने बताइन् ।
आर्थिक सवलीकरणका एजेण्डासहित चुनावी मैदानमा उत्रिएकी उनले आँफूलाई मत दिनका लागि जनता तयार रहेको बताइन् ।
अहिले चुनावी घरदैलो अभियानका क्रममा उनले इटहरीका विभिन्न वडाहरू पुग्दा जनताले गरेको स्वागत र स्नेहका कारण आफूले यसपटक चुनाव जित्ने बताएकी हुन् ।
सोमबार चुनावी घरदैलो कार्यक्रम अन्तर्गत इटहरीको ६ र ९ नम्बर वडामा चौधरीलाई स्थानीय मतदाताले स्वागत गर्दै विगतमा प्रतिपक्षीले धाँधली गरेको र यसपटक त्यस्तो हुन नदिन सुझाएका थिए । कोणसभामा बोल्दै नेत्री चौधरीले ३० वर्षदेखिको शासनबाट मुक्त गराउन आफ्नो उम्मेदवारी रहेको बताइन् ।
विगतमा निर्वाचित भएर गएकाले जनताको अपेक्षा र युग सुहाउँदो विकास गर्न नसकेकाले सुनसरी क्षेत्र नं. ३ ओझेलमा परेको उनको भनाइ छ । इटहरीको बसपार्क व्यवस्थापन, बढ्दो शहरीकरण व्यवस्थापन, पूर्वाधार निर्माण, शिक्षा, स्वास्थ्य क्षेत्रमा देखिएका समस्याहरू हल गर्दै इटहरीमा राष्ट्रिय तहबाट ठूला योजनाहरू ल्याउन आफूले पहल गर्ने उनको प्रतिबद्धता छ ।
इटहरी बसपार्कलाई डिजिटलाइजेसन गर्ने सवालमा काम गर्ने बताउँदै उनले व्यवस्थित बसपार्क बनाउन काम गर्ने चौधरीले बताइन् ।
‘म भगवती चौधरीले व्यक्तिगत रूपमा जति गरेपनि त्यसले ठूलो परिवर्तन ल्याउँदो रहेनछ । राज्यबाट नै लगानी र व्यवस्थापन भयो भने परिवर्तन हुँदोरहेछ, मलाई योपटक जिताउनुस म तपाईहरूलाई निराश बनाउँदिन ।’ चौधरीले मत माग्दै सम्बोधनका क्रममा भनिन् ।
मतदाताले भने निष्पक्ष निर्वाचन हुनुपर्ने पक्षमा रहेको र षड्यन्त्र हुन नदिन आँफूहरू पनि लागिपर्ने प्रतिक्रिया दिएका थिए ।
Discussion about this post