इटहरी : सुनसरी ३ बाट तेस्रो प्रयासमा नेकपा एमालेकी नेत्री भगवती चौधरी संसद छिर्ने भएकी छन् ।
उनले तेस्रोपटकमा नेपाली कांग्रेसका विजयकुमार गच्छदारलाई पराजित गर्दै संसद यात्राको तय गरेकी हुन् ।
यसअघि दुवै पटक उनै गच्छदारसँग पराजित भएकी चौधरीले तेस्रो प्रयासमा संसद यात्राको तय गरेकी हुन् । चौधरीले ४० हजार ७ सय ८८ मत प्राप्त गर्दा उनका निकटतम प्रतिद्वन्द्वी गच्छादारले ३५ हजार ६ सय मत ल्याए ।
चौधरीले आफ्ना पुराना प्रतिस्पर्धी गच्छदारलाई ५ हजार १ सय ८८ मतले पराजित गरेकी हुन् । २०७४ सालको निर्वाचनमा चौधरी थोरै मतले मात्रै पराजित भएकी थिइन् ।
२०४८ पछिका सबै निर्वाचनबाट संसदीय राजनीतिका खेलाडी बनेका गच्छदार सत्ता राजनीतिका पनि खेलाडी हुन् । गच्छदार दर्जन पटकभन्दा बढी मन्त्री बनेका छन् । तर, करिब ३ दशकभन्दा बढी सत्ता र संसदीय राजनीतिको वरिपरि रहेका गच्छदारलाई यसपटक चौधरीले पराजित गरेकी हुन् ।
सुनसरीको निर्वाचन क्षेत्र नं. ३ मा धेरैजसो ग्रामीण भेग पर्छ । यहाँ आर्थिक अवस्था कमजोर र चौधरी समुदायको बाहूल्यता छ ।
धेरैजसो सर्वसाधारण मजदूरी पेसामा निर्भर छन् । एक लाख २५ हजार ४३२ मतदाता रहेको यो इटहरीको ६ देखि १५ नं. वडा, दुहबीका १ देखि १२ (सबै वडा), बर्जु गाउँपालिकाका सबै वडा, गढी गाउँपालिकाका १ देखि ६ (सबै वडा) इनरुवा नगरपालिकाको ७ नं. वडा समावेश छन् ।
निर्वाचित चौधरीका यस्ता छन् एजेन्डा
विभिन्न बुँदागत रूपमा एजेन्डा प्रस्तुत गरेकी चौधरीले कृषिलाई व्यवसायिक र निर्यातमुखी बनाउन जोड दिने बताएकी छन् ।
राजनीतिमा लाग्नु अगावै आम सर्वसाधरणलाई उद्यमशील बनाउन सक्रिय भएकी चौधरीले युवालाई स्वरोजगार बनाउने विभिन्न योजना रहेको र त्यसका लागि गाउँघरमै प्राविधिक शिक्षालय स्थपनामा पहल गर्ने उनको एजेन्डा रहेको छ ।
महिलाहरूलाई आत्मनिर्भर, स्वरोजगार बनाउन जोड दिएकी चौधरीले सामुदायिक विद्यालयको शैक्षिक स्तर सुधार्न विशेष पहल गर्ने बताएकी छन् । चौधरीले एक गाउँ, एक उद्योग स्थापनालाई विशेष जोड दिएकी छन् ।
पर्यटकीय स्थलहरुको विकास र प्रवद्र्धनका लागि रिङ रोडको अवधारणा कार्यान्वयन गर्ने बताउँदै गाउँलाई शहर र शहरलाई व्यवस्थित गर्न उनले आफ्नो एजेन्डामा प्रस्तुत गरेकी छन् ।
यस्तै, अव्यवस्थित बसोबासलाई व्यवस्थित गर्नुकासाथै भूमीहिन नागरिकलाई सम्मान र समाजिक सुरक्षा कार्यान्वयनमा जोड दिने बताइएको छ ।
Discussion about this post