इटहरी : इटहरीका समाजसेवी तथा लायन्स क्लब अफ इटहरीमा सक्रियय नरनाथ सापकोटाको निधन भएको छ ।
लायन्स क्लबकै कार्यक्रमका लागि अमेरिका प्रस्थान गर्ने तयारीमा रहेका सापकोटा काठमाण्डौँस्थित न्यू रोडमा रहेको एक घरको पार्किङमा आइतबार दिउँसो लडेका थिए ।
लायन्स क्लब अफ इन्टरनेशनल डिस्ट्रिक ३२५ ए १ का पाष्ट डिस्ट्रिक गर्भनर अनन्त भेटवालका अनुसार उनी लडेपछि अस्पताल जाउँ भनेर अनुरोध गर्दा सापकोटाले आँफूलाई केही नभएको भन्दै अस्पताल जान मानेका थिएनन् ।
घटनापछि सापकोटा पुनः आँफू बसेको कोठामा नै फर्किएको भेटवालले जानकारी दिए । उनका अनुसार कोठा फर्किएपछि फोन गर्दा नउठेपछि बोलाउन पुग्दा खाट र टेबलको बीचमा बेहोस अवस्थामा फेला परेका थिए ।
बेहोस अवस्थामा फेला पर्नासाथ तत्काल काठमाण्डौँ मेडिकल कलेजमा भर्ना गरिएको थियो । उपचारका क्रममा उनको मंगलबार निधन भएको बताइएको छ ।
सापकोटा लायन्स इन्टरनेशनल डिस्ट्रिक ३२५ सी का २०२३।२४ का लागि डिस्ट्रिक गर्भनर बन्ने तयारीमा थिए । सोही तयारीका लागि अमेरिकाको सिकागोमा फेब्रुअरी ५ देखि ११ तारिखसम्म हुन लागेको डिजिइ तालिममा सहभागी हुन जानकै लागि उनी इटहरीबाट काठमाण्डौँ गएका थिए ।
इटहरीको अभिभावकका रूपमा रहेका सापकोटाको शव आजै इटहरी ल्याउने तयारी भइरहेको छ । सापकोटा नेपाली कांग्रेस प्रदेश १ का प्रदेश प्रतिनिधि समेत हुन् । उनी सामाजिक काममा पनि सक्रिय थिए । उनको निधनमा इटहरीबासीले शोक व्यक्त गरेका छन् ।
Discussion about this post