इटहरी : निजी तथा आवासीय विद्यालय अर्गनाइजेशन नेपाल (प्याव्सन) प्रदेश १ द्वारा ‘प्रेसिडेन्ट कप’को तयारी गरिएको छ ।
बुधबार (आज) इटहरीमा पत्रकार सम्मेलन गर्दै प्रतियोगिताबारे जानकारी गराइएको हो ।
प्याव्सन प्रदेश १ का अध्यक्ष टीकाराम ढकालका अनुसार ‘अन्डर १५’ फुटबल प्रतियोगिता तथा कक्षा १२ सम्मको ‘प्रेसिडेण्ट कप रनिङ्ग सिल्ड’ भलिबल प्रतियोगिता यही २७ र २८ गते इटहरी रंगशालामा हुने भएको हो ।
भलिबल प्रतियोगितामा प्रदेश १ का सुनसरी, मोरङ, झापा र तेह्रथुम गरी छात्रातर्फ ६ टिम र छात्रतर्फ ७ टिम सहभागी हुने ढकालले जानकारी दिए ।
भलिबल प्रतियोगितामा छात्र र छात्रा दुवैतर्फ सहभागी हुनेछन् । फुटबलमा भने छात्रतर्फ मात्रै सहभागी गराइने भएको छ ।
‘अन्डर १५’ छात्र फुटबल प्रतियोगितामा प्रदेश १ का ६ वटा टिम सहभागी हुने प्याव्सन प्रदेश १ का वरिष्ठ उपाध्यक्ष सुमित थापाले जानकारी दिए ।
उनका अनुसार रनिङ्ग सिल्ड भलिबल प्रतियोगिताको बिजेता टिमलाई नगद ३१ हजार, उपबिजेतालाई नगद २१ हजार, तृतीय हुनेलाई नगद ११ हजारसहित ट्रफी, मेडल र प्रमाणपत्र वितरण गरिनेछ ।
यस्तै, फुटबलतर्फ बिजेता हुने समूहलाई नगद २१ हजार र उपबिजेता हुने समूहलाई नगद ११ हजार रुपैयाँ प्रदान गरिने तयारी भएको थापाले जानकारी दिए ।
यस्तै, विभिन्न विधागत रूपमा उत्कृष्ट खेलाडीहरूलाई पनि पुरस्कृत गरिने तयारी भएको छ ।
‘हामीले पालिका स्तरबाटै जिल्ला हुँदै छनौट गरेका हौँ,’ थापाले भने, ‘जिल्लास्तरीय बिजेता र उपबिजेतालाई यो खेलमा सहभागी गराइएको हो ।’
उनका अनुसार २७ गतेको खेलमा प्रदेश १ का पर्यटन, वन तथा वातावरण मन्त्री जीवन आचार्यले खेलको उद्घाटन गर्नेछन् ।
अध्ययनसँगै खेलकुदमा पनि विद्यार्थीहरूलाई सहभागी गराउने उदेश्यले उक्त प्रतियोगिताको आयोजना गरिएको प्याव्सनले जनाएको छ ।
Discussion about this post