इटहरी : कोसी प्रदेश नामकरणको विषयलाई लिएर पहिचानबादीहरूले हिंसात्मक आन्दोलन गर्न थालेका छन् ।
शुक्रबार (आज) बिहान इटहरी २० नं. वडा कार्यालयमा तोडफोड गरिएको छ । कार्यबाहक वडाध्यक्ष तनुज गुरुङका अनुसार तालाबन्दी गर्न आएकाहरूसँग छलफल भइरहँदा वडा कार्यालमा तोडफोड गरिएको हो ।
बाक्लो संख्यामा भेला भएका पहिचान पक्षधरहरूले वडा कार्यालयका सिसा तोडफोडसँगै डिजिटल बोर्ड समेत तोडफोड गरेका छन् ।
‘बन्द गर्ने सन्दर्भमा हामीले छलफल गरिरहेका थियौँ, बन्द गर्नका लागि सभ्य हिसाबमा छलफल भइरहेको थियो, अचानक ढुंगामुढा भयो,’ उनले टाकुरासँग भने, ‘बन्द गर्नु ठिक छ, तर क्षति हुने किसिमले वडा कार्यालयमा प्रहार गर्नु त ठिक भएन ।’
इटहरी २० मा तोडफोड गरेपछि आन्दोलनकारीहरू इटहरी १९ तर्फ गएका छन् ।
यस्तै, तरहरा प्रहरी चौकीको गाडी समेत तोडफोड गरिएको छ । ना १ झ ६२० नं. को प्रहरीको गाडी तोडफोड गरिएको हो ।
वडा कार्यालयमा पुुग्नेबित्तिकै आन्दोलनकारीहरूले प्रहरीको गाडी तोडफोड गर्न थालेका हुन् । ढुंगामुढाले प्रहार हुँदा केही प्रहरीहरूसमेत घाइते भएका छन् ।
पछिल्लो समय प्रदेशको नाम पहिचानको आधारमा राखिनुपर्ने भन्दै पहिचान पक्षधरहरूले आन्दोलनका गतिविधिमा सक्रिय हुन थालेका छन् ।
शान्तिपूर्ण आन्दोलन र वार्तामार्फत माग सम्बोधन हुने भएपनि पहिचान पक्षधरले हिंसात्मक आन्दोलनमा सक्रिय हुँदा भौतिकसँगै मानवीय क्षति हुने कतिपयको विश्लेषण छ ।
Discussion about this post