झापा : झापाको काँकडभिट्टा नाकाबाट तीन बालकको उद्धार गरिएको छ ।
अपरिचित व्यक्तिले ललाइफकाइ भारत लैजाँदै गरेका ती बालकलाई भारतीय एसएसबीले सीमा नाकाबाटै उद्धार गरी नेपालमा सशस्त्र प्रहरीलाई जिम्मा लगाएको हो ।
उद्धार गरिएका बालकहरू मेचीनगर नगरपालिका १० स्थित धुलाबारी पाथीभरा टोलका १५ वर्षीय विशाल दनुवार, सोही ठाउँका १२ वर्षीय युवराज तामाङ र १२ वर्षीय सूर्य चौधरी रहेको सशस्त्र प्रहरी बल नेपाल नम्बर २ गण झापाका डीएसपी दिनेश कटुवालले जानकारी दिए ।
बालकहरूलाई भारततर्फ लगिरहेको सूचना पाएलगत्तै सशस्त्र प्रहरी बल नेपाल प्रस्तावित सीमा सुरक्षा गुल्म काँकडभिट्टाको टोलीले एसएसबीसँग समन्वय गरेको थियो ।
एसएसबीले उद्धार गरेका बालकहरूलाई सोमबार राति ८ः३० बजे सशस्त्रलाई जिम्मा लगाएको उनले बताए ।
Discussion about this post