इटहरी : इटहरीमा तीन दिनदेखि जारी सांस्कृतिक पर्यटन महोत्सवमा सोमबार साँझ चर्चित गायक प्रमोद खरेलले प्रस्तुति दिएका छन् ।
झरी, वर्षातको प्रवाह नगरी गायक खरेलले आफ्नो प्रस्तुति दिदाँ दर्शकहरू झुमेका छन् ।
विकास निर्माणकर्ताहरूको सञ्जालद्वारा आयोजित महोत्सवमा गायक खरेलले आधा दर्जन बढी गीत गाए । ‘म बाँचेकै तिमीसँग माया लाउन हो’, ‘रातो टीका निधारमा’, ‘झ्यालबाट हेर, त्यही बाटो आउँछु’ लगायतका आधा दर्जन बढी गीतहरू गाएका थिए ।
खरेलले गीत गाउँदा झमझम पानी परिरहेको थियो । पानीको प्रवाह नै नगरी गायक खरेलले प्रस्तुति दिदाँ दर्शकहरू उनको गीतसँगै नाचेका थिए । पानीमा रुझ्दै दर्शकसँगै उनले पनि मनोरञ्जन लिए ।
झरी र वर्षातको समयमा पनि बाक्लो मात्रामा उपस्थित भएका दर्शक उनीसँगै नाच्दा खरेल खुशी देखिन्थे । आँफूले पटकपटक इटहरीमा प्रस्तुति दिएको स्मरण गर्दै उनले आगामी दिनमासमेत दर्शकसँग भेट गर्ने वाचासहित छुटे ।
निकैबेरदेखिको पर्खाइमा रहेका दर्शकले गायक खरेलको प्रस्तुतिको मज्जा लिनुअघि गायक प्रकाश सपुत र नायिका वर्षा सिवाकोटीको प्रस्तुतिमासमेत रमेका थिए ।
असोज २० गतेदेखि सुरु भएको महोत्सव कात्तिक ४ गतेसम्म सञ्चालन हुने आयोजक कमिटिका अध्यक्ष विशुधन राईले जानकारी दिए । उनकाअनुसार महोत्सवममा स्थानीय तथा राष्ट्रिय स्तरका कलाकारहरूले प्रस्तुति दिनेछन् ।
Discussion about this post