धरान : धरानस्थित वीपी कोइराला स्वास्थ्य विज्ञान प्रतिष्ठानका एक सय ७७ जना चिकित्सकले सामूहिक राजीनामा दिएका छन् ।
नन् मेडिकल कर्मचारीको १५ वर्षदेखि र चिकित्सकहरूको करिब ७ वर्षदेखि बढुवा रोकिएको भन्दै आन्दोलनरत चिकित्सकहरूले बुधबार स्वास्थ्य तथा जनसंख्यामन्त्री मोहनबहादुर बस्नेतलाई मन्त्रालयमै भेटेर सामूहिक राजीनामापत्र बुझाएका हुन् ।
चिकित्सकहरूले स्वास्थ्यमन्त्री बस्नेतलाई भेटेर प्रतिष्ठानको अवस्था र चिकित्सक शिक्षकको बढुवा रोकिएको गुनासोसहित मंगलबार ज्ञापनपत्र बुझाएका थिए ।
उनीहरूले प्रतिष्ठानमा चिकित्सकको धेरै दरबन्दी खाली भएरपनि विगत सात वर्षदेखि बढुवा प्रक्रिया अवरुद्ध भएको र दुई वर्षयतामात्र ५० भन्दा बढी दक्ष चिकित्सकहरुले प्रतिष्ठान छाडेको, विभिन्न विभागमा प्रोफेसर तहका चिकित्सक अभाव भएर प्रतिष्ठानको पठानपाठनमा असर परेको बारेमा मन्त्री बस्नेतलाई जानकारी गराएका थिए ।
जवाफमा मन्त्री बस्नेतले राष्ट्रिय योजना आयोगका उपाध्यक्ष र प्रतिष्ठानका पदाधिकारीहरूलाई पनि बोलाएर निकास निकाल्न निर्देशन दिएको जानकारी दिँदै पन्छिएको उनीहरूको आरोप छ । आँफूहरूको मागप्रति मन्त्री बस्नेत गैरजिम्मेवार बनेपछि राजीनामा दिनुपरेको प्रतिष्ठानका सहप्राध्यापक डा. एसपी रिमालले जानकारी दिए ।
Discussion about this post