इटहरी : नरबहादुर कर्माचार्य स्मृति प्रतिष्ठान सुुनसरीको भवन व्यक्तिको जग्गामा निर्माण गरेको पाइएको छ ।
इटहरी उपमहानगरपालिका ३ याक्थुङ चौकस्थित प्रतिष्ठानको नाम भजाँएर (अनिता परियार) व्यक्तिको जग्गामा भवन निर्माण गरेको पाइएको हो । उक्त भवन अहिले निजी आवासका लागि प्रयोग भइरहेको छ । सो भवनमा अनिता परिवारका भाई बुहारी बस्दै आएका छन् ।
संविधानसभा सदस्यसमेत रहेकी अनिता परियारको नाम दर्तामा रहेको डेढ कट्ठा जमिनमध्ये १० धूर जमिनमा प्रतिष्ठानले भवन बनाएको छ । परियार संविधानसभा सदस्य रहेको समयमा संघीय सरकारबाट बजेट बिनियोजन गरी भवन निर्माण गरिएको हो ।
स्रोतका अनुसार सुरुआती दिनमा स्थानीय समुदायका मानिसहरूलाई संलग्न गरी कृषक समूह गठन गरियो । सोही कृषि भवन निर्माणार्थ संघीय सरकारबाट बजेट बिनियोजन गरिएको थियो ।
तर, कृषि समूहलाई थाहै नदिई नरबहादुर कर्माचार्य स्मृति प्रतिष्ठानको नाममा बनाइयो । जुन भवन प्रतिष्ठानको नाममा नभई अनिता परियारको नाममा रहेको छ ।
त्यसबेला संविधानसभा सदस्य रहेकी परियारको सांसद विकास कोष र पहुँचको आधारमा संघीय सरकारबाट बजेट बिनियोजन गरिएको थियो । अहिले प्रतिष्ठानको तीन तले भवन (ट्रष्टसहित) निर्माण सम्पन्न भइसकेको छ । तर, भवन निर्माण भएपनि नक्सा पास भने गरेको पाइएन ।
यस विषयमा इटहरी उपमहानगरपालिकाको घर नक्सा शाखामा घर (भवन) नक्सा पासको कागजात ‘सूचनाको हक प्रयोग’ गर्दै खोजी गरेपनि पाइएन । उता प्रतिष्ठान भने नक्सा पास गरेर मात्रै भवन निर्माण गरेको दाबी गर्छ ।
नेकपा माओबादी केन्द्रबाट संविधानसभा सदस्य हुँदै प्रतिनिधिसभा सदस्यसमेत बनेकी परियारले सांसद भएकै समयमा संघीय सरकारले बजेट बिनियोजन गरेको थियो । पहुँच र सत्ताको दुरुपयोग गर्दै बजेट हत्याएको पाइएको छ ।
खासगरी नरबहादुर कर्माचार्य स्मृति प्रतिष्ठान नेकपा माओबादी निकट रहेको छ । प्रतिष्ठानलाई आफ्ना कार्यकर्ता भर्तीकेन्द्रजस्तो रहेको आरोपसमेत लाग्दै आएको छ । उक्त प्रतिष्ठानको केन्द्रीय अध्यक्ष नारायणकाजी श्रेष्ठ छन् । गृहमन्त्रीसमेत रहेका श्रेष्ठ इटहरीमा रहेको यो भवनबारे जानकार छन् ।
प्रतिष्ठानलाई यो जग्गा उपलब्ध गराउने भन्नेबारे कतै उल्लेख छैन, न कुनै निर्णय नै भएको छ । यद्यपि, प्रतिष्ठानले भने निर्णय गरिसकेको दाबी गर्दै आएको छ ।
आफ्नो व्यक्तिगत जमिनमा शक्तिलाई हत्याउँदै व्यक्तिको जमिनमा राज्यले लगानी गर्दै आएको छ । खासगरी प्राविधिक विषय अध्यापन हुँदै आएको प्रतिष्ठानले इटहरी ९ मा हाल सञ्चालनमा रहेको क्याम्पस यहाँ सार्ने तयारी गरेको बताएपनिहालसम्म क्याम्पस सार्ने प्रक्रिया भने अगाडि बढाइएको छैन ।
प्रतिष्ठानको भवन तीन वर्षअघि नै निर्माण सम्पन्न भइसकेपनि क्याम्पस हालसम्म भाडाको भवनमा रहेको छ । प्रतिष्ठानले क्याम्पसका लागि मासिक दुई लाख भाडा तिर्दै आएको क्याम्पस प्रशासनले जानकारी दियो ।
उता, अनिता परियारका भाईबुहारीसहित नेकपा माओबादी केन्द्र इटहरीका नेतासमेत रहेका बहादुरसिंह तामाङ (ज्वाला) समेत यही भवन छेउमा रहेको प्रतिष्ठानकै भनिएको टिनको छानो लगाएको घरमा बस्दै आएका छन् ।
ज्वालाले उक्त भवन प्रतिष्ठानको नाममा ल्याउने तयारी भएको र प्रक्रियामै रहेको स्वीकार गरे । ‘भवनलाई प्रतिष्ठानको नाममा ल्याउने प्रक्रिया भइरहेको छ,’ उनले टाकुरा न्यूजसँग भने, ‘लामो र झण्झटिलो प्रक्रिया रहेका कारण अझै केही समय लाग्छ ।’
यता, नरबहादुर कर्माचार्य स्मृति प्रतिष्ठान सुनसरीका अध्यक्ष एकचन्द्र बराल (निर्मल) ले भने पूर्वाधार बन्नुअघि सबै भवनको नक्सा पास गरेको दाबी गरे ।
‘नक्सा पास नभई भवन बन्दैन, इटहरी उपमहानगरपालिकाबाटै नक्सा पास गरेर हामीले भवन बनाएका छौँ,’ भवन त व्यक्तिको नाममा रहेछ नि ? भन्ने प्रश्नमा उनको दाबी छ, ‘भवन प्रतिष्ठानको नाममा ल्याउनका लागि निर्णय भइसकेको छ । यो क्याम्पसको भवन नभइ प्रशासनिक भवन हो ।’
उक्त भवन ०७७ सालमा निर्माण सकिएको उनले बताए ।
‘यो भवनमा कलेज ल्याउने होइन, प्रशासनिक भवन हो,’ उनले भने, ‘समुदायबाट प्रतिष्ठानलाई प्राप्त जग्गामा भवन बनाएका हौँ । क्रमशः प्रतिष्ठानको नाममा आउँछ, निर्णय भइसकेको छ ।’
उनले चालू आर्थिक वर्षभित्रमा प्रतिष्ठानको नाममा भवन आउने दाबी गरे ।
प्रतिष्ठानले २०७४ पुस १६ गते जिल्ला प्रशासन कार्यालय सुनसरीमा शाखा दर्ता गरी विद्यार्थी भर्ना गरेर अध्यापन गराउँदै आएको छ । इटहरी उपमहानगरपालिका वडा नं. ६ मा शाखा कार्यालय रहनेगरी शाखा दर्ता गरिएको छ । नरबहादुर कर्माचार्य स्मृति प्रतिष्ठानको मुख्य कार्यालय ललितपुरमा रहेको छ ।
प्रतिष्ठानले २०७५ यता सुनसरीमा बालीविज्ञान, एग्रीकल्चर, सिभिल इञ्जिनियरिङ, हस्पिटालिटी एण्ड होटल म्यानेजमेन्ट अध्यापन गराउँदै आएको जनाएको छ । यस्तै, निःशुल्क कार्यक्रम अन्तर्गत प्रि डिप्लोमा तहको औद्योगिक प्रशिक्षार्थी कार्यक्रम सञ्चालन गरिरहेको दाबी गरिएको छ ।
यता, इटहरी ३ का वडाध्यक्ष उमेश सुवेदीले भने आँफू यस विषयमा जानकार नरहेको प्रतिक्रिया दिए । उनले भने, ‘हाम्रो कार्यकाल आउनुभन्दा अगाडि नै बनेको भवन हो, हरेक वर्ष प्रतिष्ठानले विभिन्न निकायबाट बजेट ल्याइरहेको छ ।’
उनले आँफूले वडा कार्यालयबाट भने बजेट बिनियोजन नगरेको र अन्य निकायबाट प्रतिष्ठानले हरेक वर्ष बजेट ल्याइरहेको प्रतिक्रिया दिए ।
नेपाल कम्युनिष्ट पार्टीका संस्थापक सदस्य नरबहादुर कर्माचार्यको नाममा २०७३ सालमा स्थापित ‘नरबहादुर कर्माचार्य स्मृति प्रतिष्ठान’ ले नरबहादुर कर्माचार्य स्मृति बहुप्राविधिक शिक्षालयको नाममा अध्यापन गराउँदै आएको छ ।
Discussion about this post