इटहरी : कोसी प्रदेशबाट राष्ट्रियसभा सदस्यमा विजयी भएकी रुक्मिणी कोइराला इटहरी २ निवासी हुन् । उनी एमालेको तर्फबाट राष्ट्रियसभा निर्वाचनमा माओबादीकी चम्पादेवी कार्कीलाई पराजित गर्दै निर्वाचित भएकी हुन् ।
भूमिगत गतिविधिबाट राजीतिमा सक्रिय बनेकी कोइराला ०४६ सालपछि राजनीतिमा उदाएकी नेत्री हुन् । नेकपा एमालेका त्यागी नेता स्व. ओम कोइरालाकी बुहारी (भाइकी श्रीमती) उनी घरको बुहारीका रूपमा काम गर्थिन् ।
त्यसबेला कोइराला परिवारमा मदन भण्डारीसहितका एमाले नेताहरू आउँथे । भूमिगत गतिविधि पनि उनको घरबाटै सञ्चालन हुन्थ्यो ।
त्यसैबेलादेखि पार्टीका नेताहरूसँग चिरपरिचित रहेकी उनले ०४६ सालबाट सक्रिय रूपमा राजनीतिमा होमिइन् । उनी यसअघि पार्टीको जिल्ला, प्रदेश सदस्य हुँदै हाल अखिल नेपाल महिला संघको केन्द्रीय सदस्य छिन् ।
इटहरी २ का वडाध्यक्षसमेत रहेका उनका देवर माधव कोइरालाका अनुसार पार्टीमा निरन्तरता र सक्रियताकै कारण आज उनी राष्ट्रियसभा सदस्यमा निर्वाचित भएकी छन् ।
‘भाउजूले सानै उमेरमा दाइसँग बिहे गर्नुभएको हो । दाइ दस कक्षामा पढ्नुहुन्थ्यो । बिहे भएर आएको कुरा मलाई थाहा नै छैन,’ कोइरालाले टाकुरा न्यूजसँग भने, ‘जेठा दाइ –ओम कोइराला) पहिलादेखि नै राजनीतिमा लाग्नुभयो । यसै क्रममा हाम्रो घरबाट भूमिगत गतिविधि पनि हुन्थ्यो । हाम्रोमा आएका नेताहरूलाई भाउजूले चिया पकाएर दिने गर्नुहुन्थ्यो । त्यही क्रममा नेताहरूसँग पनि राम्रो सम्बन्ध भयो ।’
नेताहरू आउजाउ भइरहने र सोही प्रभावका कारण उनी पनि पार्टीको सदस्य हुँदै हाल राष्ट्रियसभामा निर्वाचित भएकी छन् ।
नेताहरूसँगको घुलमिलका कारण पार्टी राजनीतिमा सक्रिय हुँदै उनी निरन्तर योगदान गर्दै गइन् ।
फलस्वरुप २०५४ सालमा भएको स्थानीय निकायको निर्वाचनमा उनले इटहरी वडा नं. २ बाट महिला सदस्यमा निर्वाचित भइन् । महिला सदस्यमा निर्वाचित भएर जनसेवामा खटिएकी उनी पछि स्वयम्सेवकसमेत बनिन् ।
‘भाउजू यो बीचको समयमा निकै बिरामी पनि हुनुभयो । तर, बिरामी भएपनि पार्टीमा निरन्तर लाग्नुभयो । पार्टीको जे जिम्मा दिन्छ त्यसलाई सक्रियतापूर्वक निर्वाह गर्नुभयो,’ वडाध्यक्ष कोइरालाले भने, ‘सोही निरन्तरताकै कारण आज सफलता मिलेको छ ।’
उनी इटहरी २ मा स्वयम्सेवक थिइन् । केही समयअघि मात्रै उनले सो पदबाट राजीनामा दिएकी हुन् । दुई छोरा र दुई छोरीकी आमा रुक्मिणीको निरन्तरता नै सफलताको सुत्र रहेको जानकारहरू बताउँछन् ।
पारिवारिक पृष्ठभूमि नै राजनीति
कोइरालाको पारिवारिक पृष्ठभूमि पनि राजनीति नै हो । सानै उमेरमा बिहे गरेर आएपनि घरको वातावरणले उनलाई राजनीतिमा सक्रियता हुन प्रेरित ग¥यो । खासगरी जेठाजु ओम कोइराला राजनीतिमा सक्रिय थिए । मजदुर नेतासमेत भनेर चिनिने कोइरालालाई त्यागी नेताका रूपमा समेत चिनिन्छ ।
०३९ सालमा जननेता तत्कालीन एमाले नेता मदन भण्डारीले जोडबल गर्दा पनि राष्ट्रिय पञ्चायत सदस्यको निर्वाचनमा जनपक्षीय उम्मेदवार नहुनु र सुनसरी पार्टीकै पनि प्रथम नेतृत्व गर्ने सवालमा आँट नगरेको कोइरालामाथि आरोपसमेत लाग्ने गथ्र्यो ।
एक इमान्दार नेताका रूपमा चिनने ओमको २०७८ असोजमा निधन भइसकेको छ । यद्यपि, ओमका भाइ माधव कोइराला अहिले इटहरी उपमहानगरपालिका वडा नं. २ का वडाध्यक्ष छन् ।
गत स्थानीय तहको निर्वाचनमा उनी वडाध्यक्ष निर्वाचित भएका हुन् । पारिवारिक पृष्ठभूमि सबै राजनीतिक नै रहँदा रुक्मिणीलाई पनि राजनीतिमा होमिन सहज भयो ।
राष्ट्रियसभा निर्वाचनका लागि एमाले केन्द्रीय कमिटिबाटै उनको नाम सिफारिस भएको एमाले नेताहरू बताउँछन् ।
‘उहाँको नाम पार्टी केन्द्रीय कमिटिबाटै सिफारिस भएको हो,’ एमाले सुनसरीका एक नेताले भने, ‘निरन्तर र अनवरत रूपमा पार्टीमै योगदान गर्नुभएका उहाँजस्ता मानिस राष्ट्रियसभामा जानु हाम्रो लागि खुशीको कुरा हो ।’
Discussion about this post