विराटनगर : मोरङको पथरीशनिश्चरे नगरपालिका ७ कीर्तिपुरमा रहेको बालकल्याण माध्यमिक विद्यालयका विद्यार्थी र अभिभावकले विभिन्न माग गर्दै प्रदर्शन गरेका छन् ।
व्यवस्थापन समितिले पूर्णता नपाएको, स्कुल प्रशासनले समय तालिकाअनुसार स्कुल सञ्चालन नगरेको, स्थानीय विषयमा पठनपाठन नगरेको, सेवामुखी स्कुल नभएको, राजनीतिकरण भएको, विद्यार्थीले कुटपिट गर्ने गरेको, निजी विद्यालयसँग विद्यार्थीको सौदाबाजी गरेको भन्दै उनीहरूले विरोध प्रदर्शन गरेका हुन् ।
विद्यार्थीहरूले दिवा खाजामा पारदर्शीता हुनुपर्ने, शिक्षकहरूले पूरा समय अध्यापन गराउनुपर्ने लगायतका मागसमेत राखेका छन् ।
प्रदर्शनका क्रममा उनीहरूले असक्षम शिक्षक प्रशासन चाहिँदैन, विद्यालयमा राजनीतिककरण बन्द गर ! जस्ता नाराबाजी समेत गरेका छन् ।
मंगलबारदेखि आफूहरूले विरोधका कार्यक्रम सुरु गरेको स्थानीय अभिभावक लेखनाल लुइँटेलले बताए । ‘हामीले हाजिरी परीक्षण गर्दा शिक्षक र विद्यार्थीहरुको उपस्थिति नै भएन,’ त्यसपछि हामीले विरोधका कार्यक्रम सुरु गरेका हौं ।’
अभिभावक र विद्यालयका प्रधानाध्यापक रोहिणी घिमिरेसँग कुरा गर्दापनि आफूहरूका मागबारे सुनुवाई नभएको कारण विद्यार्थीसहित आन्दोलनमा जानुपरेको उनले बताए ।
विद्यालय व्यवस्थापन समिति अध्यक्ष चयन गर्दा राजनीतिक भागबण्डा गर्न खोजेको उनको आरोप छ ।
‘विद्यालय लथालिङ्ग अवस्थामा छ । हिसाब किताब पारदर्शी छैन । यसको न्यायिक निकायबाट आवश्यक छानबिन हुनुपर्छ,’ लुइँटेलले भने, ‘विद्यार्थीलाई दिवा खाजा पनि दिइएको छैन । विज्ञान र गणितको शिक्षक नियुक्ति पनि गरेको छैन । बिना शिक्षक विद्यालय कसरी चल्छ ?’
Discussion about this post