इटहरी : इटहरीस्थित कोसी सेन्ट जेम्स माध्यमिक विद्यालयमा शैक्षिक प्रदर्शनी आयोजना गरिएको छ । मंगलबार विद्यालय प्राङ्गणमा एक कार्यक्रमका बीच शैक्षिक प्रदर्शनी गरिएको हो ।
प्रदर्शनीमा विद्यार्थीहरूले आविष्कार गरेका सूचना, प्रविधि, विज्ञानसहित विविध विषयका स्टलहरू राखिएको थियो । एक सय ४९ वटा स्टलमा विज्ञान, प्रविधिसँगै, होटल म्यानेजमेन्ट, कला, साहित्य, संस्कृति, भाषाका कुरासहित सामाजिक विषयमा विद्यार्थीहरूले आफैँ तयार गरेका विविध विषयका स्टलहरू रहेका थिए ।
पाठ्यपुस्तकका ज्ञानबाहेक व्यवहारिक र शैद्धान्तिक ज्ञानको विकास गर्नका निम्ति उक्त कार्यक्रमले सहज पुग्ने विद्यालयको दाबी छ ।
कोसी सेन्ट जेम्स विद्यालयका अध्यक्ष मनु मञ्जिलले विद्यार्थीहरूलाई ‘टेक्स्ट बुक’भन्दा बाहिरका ज्ञानमा ‘अपडेटेट’ गराउन उक्त कार्यक्रम आयोजना गरिएको बताए ।
उनका अनुसार उक्त शैक्षिक प्रदर्शनी चौथो संस्करण हो । यसअघि विभिन्न वर्षहरूमा तीनवटा संस्करण आयोजना भइसकेको छ ।
‘आधुनिक विश्व एकातिर कुदिरहेको छ, स्कुलको कक्षा अर्कोतिर कुदिरहेको छ,’ चर्चित कविसमेत रहेका मञ्जिलले भने, ‘विद्यार्थीहरूलाई सामाजिक, स्वास्थ्य, विज्ञान र प्रविधिका क्षेत्रमा अभ्यस्त बनाउनका निम्ति यो कार्यक्रमले सहज पुग्नेछ । हाम्रा विद्यार्थीहरूले नै आविष्कार गरेका केही प्रोजेक्टहरूले भारत र बंगलादेशलाई समेत पराजित गरेर आएका छन् ।’
विद्यार्थीले अत्याधुनिक ढंगले कम्प्युटर सम्बन्धि कुरा निर्माण गरिएको उनले बताए । विद्यार्थीहरू संस्कृतिसँग एकाकार हुन् भन्ने कुरा सिकाउनसमेत विज्ञान र प्रविधिलाई पनि सँगै लिएर जाने उदेश्यले उक्त कार्यक्रम आयोजना गरेको मञ्जिल बताउँछन् ।
‘विद्यार्थीले सुनुन् होइन, गरुन् भन्ने उदेश्यले प्रयोगात्मक ज्ञानमा लैजानुपर्छ भन्ने हाम्रो उदेश्य हो,’ उनले भने, ‘विद्यार्थीहरूले आफ्नो प्रोजेक्टबारे आम मानिससँग संवाद गरी आफूलाई समाजमा कसरी प्रस्तुत गर्ने भन्ने सिकाउनसमेत यो प्रदर्शनीले सघाउ पुग्नेछ ।’
विद्यालयका सिइओ शशि श्रेष्ठका अनुसार कक्षाअनुसार विद्यार्थीहरूले स्टल राखेका थिए । विषयगत र कक्षा छुट्याएर उनीहरूले स्टल राखेको उनले बताए ।
प्रधानाध्यापक अनन्त कुमार सुवेदीले इटहरीका ८० वटाभन्दा बढी स्कुल, कलेजहरूमासमेत निमन्त्रणा गरिएको र यो किसिमको अभ्यास अरु विद्यालयमासमेत हुनुपर्ने बताए ।
‘नर्सरीदेखि स्नातक तहसम्मका विद्यार्थीहरूले आफैं उत्पादन गरेको कुरा स्टलमा राखिएको छ,’ उनले भने, ‘यहाँ भिजिट गर्न आउनुभएका अतिथि तथा अभिभावकहरूले आफूलाई मनपरेको स्टलका सामानबारे इलेक्ट्रोनिक भोटिङ गर्ने सिस्टम समेत मिलाइएको छ । जसकारण भिजिटरलाई कुन स्टल राम्रो लाग्यो भन्ने भोट गर्न पाउनुहुन्छ । यसले विद्यार्थीहरूलाईसमेत प्रोत्साहन मिल्छ ।’
उनले सबैभन्दा बढी भोट प्राप्त गर्ने स्टलका विद्यार्थीहरूलाई पुरस्कृतसमेत गरिने बताए ।
Discussion about this post