इटहरी : इटहरी उपमहानगरपालिकाका नगर प्रहरीहरूले सफारी चालकहरूसँग अनाधिकृत तवरबाट पैसा उठाएको पाइएको छ ।
मुख्य राजमार्गहरूमा गुड्ने विद्युतीय सवारी साधन ई–रिक्सा (सिटी सफारी) चालकहरूसँग अनाधिकृत तवरबाट पैसा लिएको पाइएको हो ।
नगर प्रहरीहरूले सादा कागजमा ‘बाटो इजाजत नभएको’ भन्दै पाँच सय रुपैयाँको चिट काटेर चालकहरूसँग अनाधिकृत तवरबाट पैसा लिएको पाइएको हो ।
‘श्री कर शाखा, बाटो इजाजत नभएको रु. ५००। जरिवाना ।’ अलिक तलपट्टी हस्ताक्षर र मिति उल्लेख छ ।
यसरी मुख्य राजमार्गमा गुडिरहेका सवारी साधन नगर प्रहरीले चेकजाँच गर्नै नपाइने कानुनी व्यवस्था छ । तर, कानुनी व्यवस्थाको धज्जी उडाउँदै नगर प्रहरीहरूले अनाधिकृत रूपमा पैसा लिएका हुन् ।
यसबारे नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका प्रमुख, प्रहरी उपरीक्षक (एसपी) सरोज पौडेल भन्छन्, ‘नगर प्रहरीलाई फाइन काट्न पाउने त अधिकार नै छैन ।’
सवारी साधनको चेकजाँच गर्ने अधिकार ट्राफिक प्रहरीलाई मात्रै रहेको उनले बताए । ‘कागजात चेक गर्ने अधिकार ट्राफिक प्रहरीलाई नै हो । तर, नगरपालिकाभित्र बेग्लै नीति पनि हुनसक्छ,’ उनले टाकुरा न्यूजसँग भने, ‘तर, नियम उल्लंघन गरेको, कागजपत्र भए, नभएको भन्नेबारे ट्राफिक प्रहरीले मात्रै फाइन काट्ने अधिकार छ ।’
नगर प्रहरीले पार्किङ व्यवस्थापनको कुरामा मात्रै जरिवाना लिन सक्ने उनको भनाइ छ । नगर प्रहरीले चिट नै काट्ने अधिकार नरहेको एसपी पौडेलले दोहो¥याए ।
उता, मेयर पौडेलसँग यसबारे बुझ्न पटकपटक फोन सम्पर्क गरेपनि सम्पर्क हुन सकेन ।
सफारी चालक मीनराज ढकालले नगर प्रहरीबाट विभिन्न बहानामा कुटपिट गर्ने, लखेट्ने र यातना दिने काम भइरहेकोसमेत बताए ।
‘नगर प्रहरीले सादा पेपरमा चिट काटेर दुःख दिने गरेको छ । सादा पेपरमा कुन आधारमा चिट काटियो ?,’ उनले भने, ‘हामीले अदालतबाट मुद्दा जितिसकेको अवस्थामा मजदुरलाई लात हान्न मिल्छ ?’
सफारी चालकको बिलबुक, लाइसेन्स माग्दै नगर प्रहरीले दुःख दिएको उनको भनाइ छ । सफारी चालक इटहरी ४ निवासी नरबहादुर सुनार भन्छन्, ‘नगर प्रहरीले लछारपछार गरी कानुन नै हातमा लिएर लाठी चार्ज ग¥यो । इटहरीका मेयर हेमकर्ण पौडेलको निर्देशन भन्दै नगर प्रहरीले मजदुरमाथि यातना दियो ।’
सर्वहारा मजदुरमाथि अन्याय र अत्याचार भएको उनको दुखेसो छ । आफूहरूले उपमहानगरले तोके बमोजिम पालिकामै सिटी सफारी दर्ता गरेर मजदुरी गरेपनि नगर प्रहरीले ज्यादति गरेको उनले बताए ।
मुख्य राजमार्ग ट्राफिक प्रहरीको क्षेत्राधिकारभित्र पर्ने भएपनि नगर प्रहरीले सफारी चालकमाथि दुःख दिएको मजदुरहरूको भनाइ छ ।
सुन्दरहरैँचा निवासी चालक सरिता सरदारका अनुसार एक दर्जन बढीको संख्यामा नगर प्रहरीले बाटो नै छेकेर चालकलाई दुःख दिने गरेका छन् ।
‘सफारी धकेलेर चाबी खोस्ने, दुःख दिने गरिएको छ,’ उनले भनिन्, ‘अति भएपछि आज त गाडी नै लैजा भनेर बुझाएँ ।’ उनले नगर प्रहरीबाट आफूहरू आजित भएको बताइन् ।
लाठी चार्जपछि इलाका प्रहरी कार्यालयमा नगर प्रहरीहरूले ‘माथिको आदेश’ भएको र माथि नै कुरा गर्न भनेका छन् । प्रहरी निरीक्षकको कार्यकक्षमा भेला भएका अर्जुन बस्नेतसहितका नगर प्रहरीहरूले मेयर हेमकर्ण पौडेलको आदेश भएको र आफूहरूले जति छलफल गरेपनि केही नहुने प्रतिक्रिया दिए ।
‘मेयर साबको आदेश भएकाले सवारी चेकजाँच गरेका हौँ,’ उनले भने, ‘हामीलाई भनेर पनि केही हुँदैन । उहाँसँगै कुरा गर्नुहोस् ।’
यसअघि इटहरी उपमहानगरले मोरङको सुन्दरहरैँचा नगरपालिकाबाट यहाँ भित्रने सफारीहरूलाई टाइम कार्ड लागू गरेको थियो । नगर सीमा क्षेत्रभित्र नगरले तोकेको समयसीमा मात्रै सफारी चल्नुपर्ने, अन्यथा कारबाहीको प्रक्रिया अगाडि बढाउने उपमहानगरले निर्णय गरेको थियो ।
तर, टाइम कार्डको विरुद्व उच्च अदालतमा रिट परेसँगै यसअघि नै उच्च अदालतले अन्तरिम आदेशसमेत दिएको थियो । उच्च अदालत विराटनगरले सिटी सफारीलाई रोक्ने र अन्य कुनै पनि प्रकारको कर लिने कार्य नगर्न अन्तरिम आदेश दिएको थियो ।
सफारी चालकको पेसा व्यवसाय तथा रोजगारीमा प्रत्यक्ष असर पुग्ने भन्दै निर्णय कार्यान्वयन नगर्न अदालतले आदेश दिएपनि उपमहानगरले आफूखुशी मुख्य राजमार्गमा सफारीको कागजपत्र चेकजाँच गर्दै आएका छन् ।
भिडियो
यो पनि – इटहरीका नगर प्रहरीद्धारा पत्रकारमाथि ‘ठेगानमा बस्’ भन्दै हातपात
Discussion about this post