जो साथीको घरमा सुत्न आए, उसैले सुतिरहेको अवस्थामा हत्या गरे

झापा : झापामा धारिलो हतियार खन्ती प्रहार गरी एक युवकको हत्या गरिएको छ।

भद्रपुर नगरपालिका २ स्थित गौरीशङ्करमा अन्दाजी ३५ वर्षीय सनम राईको आज (बिहीबार) बिहान ५ बजेतिर हत्या गरिएको हो।

सनमको हत्या उनकै साथी अन्दाजी २५ वर्षीय लोकबहादुर राईले गरेको जिल्ला प्रहरी कार्यालय झापाले जनाएको छ ।

लोकबहादुर गएराति सनमको घरमा सुतेका थिए। सुतिरहेको अवस्थामा खन्तीले सनमको टाउकोमा प्रहार गरी लोकबहादुरले हत्या गरेको प्रहरीको प्रारम्भिक अनुसन्धानबाट खुलेको छ।

लोकबहादुरलाई प्रहरीले घटनास्थलबाटै नियन्त्रणमा लिएर आवश्यक अनुसन्धान सुरु गरेको छ । प्रहरीले कानुनी प्रक्रिया पूरा गरी शव पोस्टमार्टमका लागि अस्पताल पठाएको जनाएको छ ।