इटहरीमा हेमकर्णको २४ महिना, २८ काम !

इटहरी : जनप्रतिनिधिको रूपमा हेमकर्ण पौडेलले इटहरी उपमहानगरपालिकाको नेतृत्व सम्हालेको आगामी जेठ ९ गते २ बर्ष पूरा हुँदैछ ।

नेतृत्व परिवर्तन भएको इटहरीमा पछिल्लो २ वर्षमा धेरै परिवर्तनको महसुस भएको उपमहानगर स्रोत बताउँछ ।

निर्वाचित भएसँगै सकारात्मक कामको सुरुवात गरेका मेयर पौडेलले दोस्रो वर्ष भने ठूला र इटहरीको लागि महत्वपुर्ण कामले चर्चा पाएको छ ।

बाढीको डुबानबाट इटहरीबासीलाई जोगाउने मुल मुद्धा लिएर चुनाव जितेका उनी अहिले यही मुद्दामा प्रवेश गर्दैछन् । कामको सुरुवातसँगै जनप्रतिनिधिबीच विवाद पनि सुरु भएको छ ।

२४ महिना, २८ काम

१. सार्वजनिक शौचालय : सरकार प्रमुखको रूपमा निर्वाचित भएर आएका मेयर पौडेलले सार्वजनिक शौचालय निर्माणलाई प्राथमिकता दिए । जसअनुसार इटहरीका मुख्य भीडभाड हुने सार्वजनिक स्थानमा शौचालय निर्माण भएको छ । हाल ४ वटा शौचालय निर्माण भएको छ ।

२. थारु पहिलो जाति घोषणा : पोडेलले प्राचिन कालदेखि बसोबास गर्दै आएका ‘थारु’ जातिलाई इटहरीको पहिलो जाति घोषणा गरे । आफ्नो घोषणापत्रलाई कार्यान्वयन गर्दै मेयर पोडेलले थारुलाई पहिलो जाति घोषणा गरी आफ्नो वाचा पूरा गरेको बताउँछन् ।

३. ग्रामथानको सूचीकरण : उनले पहिलो जाति थारुको धार्मिक तथा साँस्कृतिक भूमि ग्रामथानको संरक्षण गर्न सूचीकरण गर्ने कामको थालनी गरेका छन् । ग्रामथानहरूको पुर्ननिर्माण थालिएको छ ।

४. विद्यालयमा दिवा खाजा कार्यक्रम : देशभरमै पहिलोपटक भनेर दाबी गरिएको कक्षा ६ सम्म विद्यालय खाजा कार्यक्रम सुरु गरेर इटहरीले राम्रै चर्चा पायो ।

विद्यार्थीहरूले अहिले साताको ६ दिन विभिनन पौष्टिक खानेकुरा प्राप्त गर्दै आएका छन् । यसकारण पनि विद्यार्थी ‘ड्रप आउट’ हुने, विद्यालय नआउने समस्या हटेको उपमहानगरको दाबी छ ।

५. इटहरी अस्पतालमा सुधार : अस्पतालको सेवामा सुधार आएसँगै इटहरी अस्पतालको मुहार फेरिएको छ । २४ सै घण्टा इमरजेन्सी सेवा, १५ बेडमार्फत बिरामीको उपचार सुरु भएको छ ।

अस्पतालमा अहिले दैनिक रूपमा हाडजोर्नी, महिला तथा स्त्री रोग विशेषज्ञ र बालरोग विशेषज्ञ डाक्टरले बिरामीको उपचार गर्दै आएका छन् । अस्पतालमा नियमित रूपमा रगत जाँच, एक्स रे, भिडियो एक्स रे, ई–सिजी लगायतका स्वास्थ्य परीक्षण हुन थालेको छ । ठूलो संख्यामा बिरामीहरु उपचारका लागि अस्पताल आउन थालेका छन् ।

६. घरदेखि घाटसम्म निः शुल्क शव वाहन सेवा : मेयर पौडेलले घरदेखि घाटसम्म निःशुल्क शव वाहन सेवा दिने घोषणा गरे । सोहीअनुसार अहिले शव वाहनले मृत्यु भएका परिवारका घरमा पुगेर शवलाई घाटसम्म निःशुल्क पु¥याउने काम गर्दै आएको छ ।

७. इटहरीबासीलाई निःशुल्क एम्बुलेन्स सेवा : इटहरी उपमहानगरपालिका २ वटा एम्बुलेन्सले २४ सै घण्टा बिरामीलाई अस्पताल सम्म पु¥याएर सुविधा दिँदै आएको छ ।

८. मुख्य चोकमा पार्किङ निषेध, फुटपाथ व्यवस्थापन : जथाभावी पार्किङले शहर अस्तव्यस्त भएपछि उपमहानगरले मुख्य चौकको ३ सय मिटर वरपर पार्किङ निषेधित क्षेत्र घोषणा ग¥यो । मेयर पौडेल आफैँ सडकमा पुगेर नियमको कार्यान्वयन गराए । जथाभावी पार्किङ हटेपछि इटहरीको मुख्य चौक खुल्ला र सफा देखिएको छ । पार्किङको वैकल्पिक व्यवस्था गर्ने उपमहानगरले जनाएको छ ।

९. पालिकाबाटै श्रम स्वीकृति : श्रम स्वीकृतिको काम उपमहानगरपालिकाबाटै हुन थालेको छ । गत वर्षको असोज महिनादेखि उपमहानगरबाटै श्रम स्वीकृति दिन थालेपछि काठमाण्डौँ जानुपर्ने बाध्यता हटेको उपमहानगरको दाबी छ ।

१०. छ लेन सडक विस्तार : ६ लेन सडक आयोजनाको कामले गति लिएको छ । बषौँदेखि सडक मिचेर बनेका संरचनाहरू मेयर पौडेलले डोजर चलाएर भत्काएपछि अहिले सडक विस्तारको कामले तीव्रता पाएको छ ।

११. अनलाइन घर नक्सा, निःशुल्क घर डिजाइन : इटहरीमा अनलाइन प्रणालीबाट घर नक्साको इजाजत पत्र प्रदान गर्न थालिएको छ । यसकारण पनि भीडभाड हटेको छ । नगरबासीहरूले फाइल बोकेर कोठा–कोठा धाउनुपर्ने बाध्यताको अन्त्य भएको छ । काम छिटो र सजिलो तरिकाले हुन थालेको छ ।

नेपालमै पहिलोपटक भनेर दाबी गरिएको इटहरी उपमहानगरले नगरबासीलाई घरको नक्सा निःशुल्क बनाइदिने थालेको छ । १ हजार स्वायर फिट भन्दा साना घरको नक्सा निःशुल्क डिजाइन हुन्छ ।

१२. पूर्वाधार ल्याब र खाद्य प्रविधि ल्याब सुरु : ः निर्माणमा गुणस्तरीयता कायम राख्न इटहरी उपमहानगरभित्र छुट्टै पूर्वाधार ल्याब स्थापना भएको छ । ल्याबमा बालुवा, गिटी, सिमेन्ट, डन्डीको जाँच गरिन्छ । योजना सुरु गर्नुभन्दा अघि अनिवार्य गुणस्तर रिपोर्ट लिनुपर्छ ।

इटहरीमा निर्माण सामाग्रीको गुणस्तर जाँच हुन थालेपछि अन्य पालिका तथा ठूला आयोजनाहरूले पनि जाँच गर्न ल्याउन थालेका छन् । यसले राजश्वमा वृद्धि भएको छ । खाद्य ल्याब पनि स्थापना गरिएको छ । अनुगमनमा शङ्का लागेका वस्तुको नमुना सङ्कलन गरी ल्याबमा जाँच गर्न थालिएको छ ।

१३. सीसी क्यामेराको निगरानी र सुरक्षा : सहरको सुरक्षा संवेदनशीलतालाई ध्यानमा राख्दै इटहरी उपमहानगरले सार्वजनिक स्थल तथा मुख्य बजार क्षेत्रमा सीसी क्यामेरा जडान गरेको छ ।

इटहरीको मुख्य राजमार्ग, व्यस्त बजार, सार्वजनिक स्थलमा ८० भन्दा बढी सीसी क्यामरा जडान भएका छन् ।

ट्राफिक व्यवस्थापन गर्न सजिलो भएको छ । वित्तिय संस्थाहरूले सुरक्षित महसुस गरेका छन् । उपमहानगरपालिकाले सीसीटिभीमार्फत मोनिटरिङ गर्न नागरिक सहायता कक्षभित्र छुट्टै डिजिटल कक्ष स्थापना गरिएको छ ।

१४. सुविधा सम्पन्न नागरिक सहायकता कक्ष स्थापना : पुराना र थोत्रे सामान थन्काउने कवाडखाना जस्तो थियो, उपमहानगर । उपमहानगरको प्राङ्गण स्थललाई चिटिक्क परेको नागरिक सहायता कक्ष बनाइएको छ ।

अहिले सेवा लिन आएका कुनै पनि नागरिक अलमलिनु पर्दैन । सेवाग्राहीको निवेदन लेखिदिने, नबुझेको कुरा बुझाइदिने, अशक्त अपांगता भए फाइल सम्बन्धित शाखामा पु¥याएर कर्मचारीले नै काम गरिदिन्छन् । सेवा लिन पुगेका जो कोही सेवाग्राहीले निःशुल्क कालो चिया तथा कफी खान पाउँछन् ।

१५. ठेकेदारलाई कालो सूचीमा राख्दै, अधुरा काम पूरा गर्दै : काम नगर्ने निर्माण कम्पनी विरुद्ध इटहरी उपमहानगर एक्सनमा उत्रियो । योजनाहरू अलपत्र पार्ने निर्माण कम्पनीहरूलाईं कारबाही गर्दै कालो सूचीमा राख्न उपमहानगरले स्पष्टीकरण सोध्यो ।

पछि केही कम्पनीहरू सम्पर्कमा आए । अधुरा काम पुनः सुरु भएका छन् ।

१६. आधुनिक बसपार्क निर्माण शिलान्यास : आधुनिक र सुविधा सम्पन्न बसपार्क निर्माण थालिएको छ । नौ करोड ४८ लाख ८३ हजार ५ सय ५६ रुपैयाँको ठेक्कामा अहिले धमाधम निर्माण हुँदैछ ।

एक बिघा क्षेत्रफलमा फैलिएको बसपार्कमा टिकट काउन्टर, सोधपुछ कक्ष, प्रतीक्षालय, सभाहल, रेष्टुरेन्ट समेत रहनेछ । बसपार्क बनेपछि यातायाता व्यवस्थापनमा सहज हुने अपेक्षा गरिएको छ ।

१७. सुशासनमा सुधार : उपमहानगरपालिकाले प्रदान गर्ने सेवा प्रवाहलाई चुस्त दुरुस्त बनाउन नीतिगत सुधार गरेको छ । सेवाग्राहीलाई कुनै झन्झट बिना छिटो, छरितो र सहज ढंगबाट सेवा प्रदान हुन थालेको उपमहानगरको दाबी छ ।

प्रदान गरिने सेवालाई अनलाइन बनाइएको छ । नगरबासीले पहिले जस्तो फाइल बोकेर धाउनुपर्दैन । भीडभाडमा लाइन लाग्नु पर्दैन । कर तथा राजश्व तिर्न मोबाइल तथा अनलाइनबाट सजिलै तिर्न सकिन्छ ।

कर्मचारीको अनिवार्य पोसाक, इ हाजिरी, कार्यालय समयको व्यवस्थापन, सिसिक्यामराको मोनिटरिङ, नागरिक सहायता कक्ष जस्ता आधारभूत पक्षमा सुधार गरिएको उपमहानगरले जनाएको छ ।

१८. शैक्षिक गुणस्तर सुधार संकल्प अभियान : शिक्षालाई प्राथमिकतामा राखेका मेयर हेकमर्ण पौडेलले शैक्षिक गुणस्तर सुधारका लागि २७ बुँदे सङ्कल्प पत्र सार्वजनिक गरेका छन् ।

शैक्षिक सत्र २०८१ देखि विद्यालयहरूको गुणस्तर सुधारका लागि मेयर पौडेलले सङ्कल्प पत्र कडाइका साथ कार्यान्वयन गर्ने प्रतिबद्धता जनाएका छन् ।

जनप्रतिनिधिहरूले छोराछोरी सामुदायिक विद्यालयमा पढाउनु पर्ने नीति लिएको छ । राजनीति र भनसुनका आधारमा नभई आन्तरिक प्रतिस्पर्धाका आधारमा विद्यालयमा प्रधानाध्यापक नियुक्त गरिने मेयर पौडेलले घोषणा गरेका छन् ।

स्थानीय पाठ्यक्रम, थारु भाषामा पठनपाठन सुरु गर्ने सङ्कल्प पत्रमा उल्लेख गरिएको छ ।

१९. सहकारी सुधार कार्यक्रम : सहकारी संस्थाहरूमा देखिएका समस्या समाधानका लागि इटहरी उपमहानगरपालिकाले सुधारको पहल थालेको छ ।

सहकारीका सञ्चालक समितिका पदाधिकारी, लेखा सुपरिवेक्षण समिति र व्यवस्थापकको सम्पत्ति विवरण माग गर्ने नगर सहकारी समितिले निर्णय गरेको छ । सहकारी ऐनमा भएका केही ऐनलाई संशोधन, प्रतिस्थापन र नयाँ थप गर्दै देखिएका अप्ठ्यारालाई सम्बोधन गर्दै लागू गर्ने निर्णय भएको छ ।

उपमहानगरपालिकाले राम्रा सहकारीलाई पुरस्कृत गर्ने र सहकारीको नाममा बैमान गर्नेहरूलाई कानुन बमोजिम कारबाही गर्न थालेको छ । प्रत्येक वर्ष राम्रो काम गर्ने सहकारीलाई सम्मान गर्ने परम्परा सुरु गरेको छ । अर्को महत्वपूर्ण काम भनेको बचतकर्ताको रकम फिर्ता गराउने काम गरेको छ ।

२०. आकासे पुल र सभाहल ठेक्का : अब इटहरीमा आकासे पुल र सभा हल बन्ने भएको छ । दुवैको निर्माणको ठेक्का लागेको छ । अघिल्लो सरकारले बनाउने चर्चा गरे पनि नसकेको काम मेयर पौडेलको नेतृत्वमा यसलाई मूर्त रुप दिने भएको हो ।

इटहरीको मुख्य चौकको धरान रोडमा र विराटनगर लाइनको गोल्डेन चौकमा आकाशे पुल बन्ने छ । यस्तै, इटहरी ५ स्थित काव्यबाटिकाको जग्गामा सभा हल निर्माण हुनेछ ।

एकैपटक ५ सय मानिस अट्ने क्षमता भएको ३ तलाको आधुनिक सभा हल निर्माण हुनेछ । ३ तलाको भवनमा तीन स्टेप स्लोप डिजाइनको सभा हल निर्माण हुनेछ ।

यो सभा हललाई थिएटरको रूपमा प्रयोग गर्न सकिने इन्जिनियर जीवन घिमिरेले जानकारी दिए । योसँगै अन्य साना खाले २ वटा सेमिनार हल पनि निर्माण हुनेछ । सभा हलसँगै व्यवस्थित पार्किङ, फूल बगैँचाले सभागृह क्षेत्रलाई आकर्षक बनाउने छ ।

२१. खोलापैनी सफाइ टेङ्ग्रा कोरिडोर निर्माण सुरु : इटहरीलाई बाढी र डुबानबाट जोगाउने महत्वकाक्षी योजना यो वर्ष सुरु भयो ।

डुबानबाट जोगाउने मूल मुद्दा लिएर चुनाव जितेका मेयर पौडेलले लामो समयको प्रतीक्षापछि टेङ्ग्रा खोलामा डोजर चलाए । पटकपटक सार्वजनिक सूचना जारी गर्दा पनि अटेर गरेपछि बाध्य भएर डोजर चलाउनुपरेको पौडेलले बताए ।

टेङ्ग्रा खोला सफाइमा डोजर चलेसँगै इटहरीबासीलाई अब भने डुबानमा पर्नुपर्दैन कि भन्ने आशा पलाएको छ । डुबानको समस्या दीर्घकालीन रूपमा समाधान गर्न उपमहानगरले टेङ्ग्रा कोरिडोर योजना अगाडि सारेको छ ।

विश्व बैङ्कको सहयोगमा टेङ्ग्रा कोरिडोर निर्माण गर्ने उपमहानगरले जनाएको छ । तालतलैयाको मुहानदेखि दक्षिणी सीमा क्षेत्रसम्म करिब ९ किलोमिटर क्षेत्रमा कोरिडोर निर्माण हुनेछ ।

खोला सफाइसँगै अहिले कोरिडोर निर्माणको काम पनि हुँदैछ । कोरिडोर बनाउन साइड क्लियरेन्सको काम पनि सँगै हुँदैछ ।

२२. निजी विद्यालयहरूको वर्गीकरण र शुल्क निर्धारण : शैक्षिक गुणस्तर सुधारको अभियान चलाएको इटहरी उपमहानगरले निजी विद्यालयलाई व्यवस्थित गर्ने काम सुरु गरेका छन् ।

पछिल्लो ५ वर्षदेखि हुन नसकेको निजी विद्यालयको श्रेणी करणलाई परिमार्जन गर्ने र सोही आधारमा शुल्क निर्धारण गर्ने मेयर पौडेलले बताएका छन् ।

इटहरीका निजी विद्यालयहरू कुन स्तरमा छन् ? के कस्ता सेवा सुविधाहरू उपलब्ध गराइरहेका छन् ? शैक्षिक गुणस्तर कस्तो छ ? भन्ने विषयको अध्ययन भइरहेको शिक्षा, युवा तथा खेलकुद महाशाखाका प्रमुख द्रोण दाहालले जानकारी दिए ।

विद्यालयहरूको अनुगमन गरी यर्थाथ अवस्थाको मूल्याङ्कन गरी वर्गीकरण गर्ने र सोही आधारमा शुल्क निर्धारण गर्ने उनले जानकारी दिए । अभिभावकसँग माथिल्लो श्रेणीको शुल्क लिए पनि सुविधा भने तल्लो श्रेणी बराबरको दिने गरेको आरोप निजी विद्यालयलाई लाग्ने गरेको छ ।

२३. विद्युतीय शवदाह गृह : इटहरीमा विद्युतीय दासंस्कार स्थल बन्ने भएको छ । पौडेलले अगाडि सारेको योजनालाई कोशी प्रदेश सरकारले साथ दिएपछि दाहसंस्कार स्थल निर्माण हुने भएको हो ।

इलेक्ट्रिक दाहसंस्कार स्थल बनाउने विषयमा इटहरीमा मेयर हेमकर्ण पौडेल र कोशी प्रदेशका तत्कालीन वन, पर्यटन तथा वातावरण मन्त्री गणेशप्रसाद उप्रेतीबीच सम्झौता पत्रमा हस्ताक्षर भएको हो ।

यसै आर्थिक वर्षमा निर्माण सम्पन्न गर्ने गरी काम सुरु गर्ने निर्णय भएको छ । करिब ३ करोड ५० लाखको लागतमा यो निर्माण हुनेछ । कोशी प्रदेश सरकारले ७० प्रतिशत र इटहरी उपमहानगरले ३० प्रतिशत लगानी गर्ने समझदारी भएको छ ।

२४. चार वटा विद्युतीय नगर बस सन्चालनमा आउने : इटहरीमा आगामी आर्थिक वर्षदेखि नगर बस सञ्चालनमा आउने भएको छ । आर्थिक वर्ष २०८०–८१ देखि उपमहानगरपालिकाले ४ वटा विद्युतीय नगर बस सञ्चालनमा ल्याउने भएको हो ।

नगरभरी सहज र सरल रूपमा यातायातको सेवा पु¥याउन विद्युतीय नगर बस सञ्चालनमा ल्याउन लागेको उपमहानगरले जनाएको छ । नगर बस सञ्चालनको लागि कार्यपालिका बैठकमार्फत बनेको नगर बस रुट निर्धारण तथा व्यवस्थापन समितिले नगर बस चल्ने रुटको कार्ययोजना बनाइरहेको छ ।

२५. इटहरीमा अत्याधुनिक सुविधा सम्पन्न भेटेरिनरी अस्पताल : मेयर पौडेलले अत्याधुनिक भवन निर्माण गरेको जनाएका छन् । किसानका घरपालुवा जनावर बिरामी भएपछि उच्चस्तरीय उपचारका लागि अस्पताल निर्माण गरिएको मेयर पौडेलले बताए ।

भवन निर्माण भएपछि किसानका समस्या सहज ढङ्गबाट समाधान हुने उनले बताए । २ करोड ६ लाख ८२ हजार १६५ रुपैयाँ लागतमा तीन तले भवन निर्माण भएको छ ।

२६. आईसियू र भेन्टिलेटरसहितको एम्बुलेन्स : कोशी प्रदेशमै पहिलोपटक भनेर दाबी गरिएको आईसियू र भेन्टिलेटरसहितको एम्बुलेन्स सेवा सुरू जनाइएको छ ।

एम्बुलेन्स सञ्चालनले स्वास्थ्य क्षेत्रमा नयाँ आयाम थपिएको मेयर पौडेलले बताए । अहिले पनि स्वास्थ्य सेवा गरिबको पहुँचमा नभएको चर्चा गर्दै उनले स्वास्थ्य क्षेत्र सुधारमा आफू लागि परेको बताए ।

२७. बिग्रेको सडक बनाउन रोलर र ग्रेड : उपमहानगरपालिकाका मेयर हेमकर्ण पौडेलले नगर क्षेत्रमा सडक सञ्जाल विस्तारका लागि आफ्नै डोजर र रोलर खरिद गरेको बताए ।

सडक निर्माणमा थप काम गर्ने उदेश्यका साथ उपमहानगरपालिकाले खरिद गरेको डोजर र रोलर ल्याइएको छ । एक वर्षभित्र टोलटोलमा बिग्रेको सडक बनाउने र नयाँ सडक पु¥याउने महत्वकांक्षी योजना सहित इन्फास्टक्चर एम्बुलेन्स खरिद गरिएको हो ।

२८. वडा कार्यालय निर्माणदेखि दमकलसम्म खरिद : मेयर पौडेलले वडा कार्यालयहरूको भवन निर्माणमा पनि प्रथामिकतामा राखेका छन् ।

भाडामा बस्दै आएको वडा कार्यालयहरूलाई आफ्नै भवनमा राख्ने उदेश्यका साथ काम गरिरहेको उनले जनाएका छन् । यसैगरी इटहरीमा एउटा मात्रै दमकल अपुग भएको भन्दै थप एक थान दमकल खरिद गरिएको मेयर पौडेलले जनाए ।