इटहरी : इटहरी उपमहानगरपालिकाले धान्नै नसक्ने बजेट ल्याएपछि विरोध जनाएको नेकपा एमालेले अन्तिम समयमा आएर बजेट पास गराउन सहयोग गरेपछि छानबिन गर्ने भएको छ ।
एमाले इटहरी उपमहानगर कमिटीले बजेट पारित गराउन सहयोग गर्ने जनप्रतिनिधिको बिषयमा छानबिन गर्ने भएको हो ।
इटहरीका मेयर हेमकर्ण पौडेलले ३ अर्ब ५७ करोड ८४ लाख ५० हजार रुपैयाँको बजेट पेस गरेका थिए। नेकपा एमालेले औपचारिक रूपमा विरोध जनाएको उपमहानगरपालिकाको बजेट सोही आकारमा पारित भएको थियो।
उपमेयर सङ्गीता चौधरीसहित केही जनप्रतिनिधिले विरोध जनाएपनि एमालेबाटै निर्वाचित अरु जनप्रतिनिधिहरूले सहयोग गरेका कारण छानबिन गरिने पार्टी नगर अध्यक्ष रुपेश बस्नेतले जानकारी दिए ।
एमाले नगर कमिटीको संस्थागत निर्णय विपरीत जनप्रतिनिधिले भूमिका खेलेपछि छानबिन गर्न लगिएको उनले बताए ।
उनका अनुसार नगर सचिव मदन कार्की संयोजक रहनेगरी लोचन पौडेल, अवद्वेश चौधरी, दलबहादुर मगर र अनिता निरौला सदस्य रहेको समिति गठन गरी छाानबिनको प्रक्रिया अगाडि बढाइएको हो ।
नगर कमिटीको निर्णय विपरीत जनप्रतिनिधिलाई गलत कार्यमा उक्साएको भन्दै केन्द्रीय सदस्यहरू तयब हुसैन र जगदीश प्रसाद कुसियैत प्रति खेद व्यक्त गरेको छ ।
बस्नेत निर्वाचित भएर आएपछि पहिलोपटक बसेको बैठकले नै केन्द्रीय सदस्यद्धयप्रति खेद व्यक्त गरेको हो । साथै, यसबारे केन्द्रीय कमिटीमा ध्यानाकर्षण गराउने तयारी रहेको बस्नेतले जानकारी दिए ।
Discussion about this post