इटहरी : मुटु रोग विशेषज्ञ डा. माधव विष्टको सेवा इटहरीमा उपलब्ध छ । इटहरीको पश्चिम लाइनमा रहेको मुटु तथा प्रेसर क्लिनिकमा डा. विष्टको सेवा उपलब्ध हुँदै आएको हो ।
विराट मेडिकल कलेजमा मुटु रोगको सेवा उपलब्ध गराउँदै आएका विष्टले इटहरीमासमेत हरेक दिन साँझ ५ बजेपछि सेवा दिदैँ आएका हुन् । इटहरीमा ओपीडी सम्बन्धी सबै सेवा उलपब्ध हुने डा. विष्टले बताए ।
मुटु सम्बन्धी इसीजी, इको, ब्लड जाँचलगायत सबै सुविधा उपलब्ध हुने उनले बताए । डा. विष्टलाई हरेक दिन ५ बजेदेखि ७ बजेसम्म र शनिबार बिहान ९ बजेदेखि दिउँसो २ बजेसम्म सेवा लिन सकिन्छ ।
खासगरी पछिल्लो समय मुटुका बिरामीहरू बढ्दो रहेकाले बेलैमा जाँच गराउनु उपयुक्त हुने डा. विष्टले बताए । सुगर, प्रेसर, हृदयघात सम्बन्धी समस्या, थाइराइड, किड्नीको रोगी र कोलेस्ट्रोल बढेकाहरूमासमेत मुटु रोग सम्बन्धी समस्या रहने उनले बताए ।
‘भाइरल इन्फेक्सन भयो भने मुटुमा असर पर्छ । मुटुले गर्दा हो कि के कारण समस्या भएको हो भन्ने थाहा पाउन पनि बेलाबेलामा मुटु सम्बन्धी जाँच गराउनुपर्छ,’ उनले भने, ‘छाती दुख्यो भने मानिसहरू मुटु सम्बन्धी विशेषज्ञलाई देखाउँदैनन् । छातीको दुखाइलाई सामान्य रूपमा लिनुहुँदैन ।’
उनले व्यायाम नगर्दासमेत मुटु सम्बन्धी समस्या हुने जनाए । मुटुको समस्या हुँदा छातीको देब्रेतिर, दाहिनेतिर, दाँतसम्म र कानको जरासम्म दुख्ने उनको भनाइ छ । ‘श्वास फेर्न गाह्रो भयो भने मुटु फेल भएको लक्षण हो । धेरै ढुकढुक भयो भने, खुट्टा सुन्नियो भने पनि मुटुको कारण हुन सक्छ,’ डा. विष्टले भने ।
उनका अनुसार मुटु सम्बन्धी समस्या हुँदा राति सुत्न गाह्रो हुने, श्वास फेन गाह्रो हुने, प्रेसरको समस्या हुने, सुगरको मात्रा बढ्ने, कालेष्ट्रोल बढ्नेजस्ता लक्षण देखिन्छन् ।
‘आम मानिसले दबाइ खाँदा जिन्दगीभर खानुपर्छ भन्ने सोच राख्छन् । दबाइ खाएन भने जिन्दगी बाँच्दैन भन्ने चैँ थाहै हुँदैन,’ उनले भने, ‘कतिपय मानिसहरू आँखा नदेखेर जचाउँन जान्छन्, तर त्यो पनि प्रेसरको कारण हुन सक्छ । मुटुको जाँच कम्तीमा एक वर्षमा एकपटक गर्नुपर्छ ।’
उनले इटहरीमा आफूलाई जाँच गराउनसहित परामर्शसमेत लिन सकिने बताए । इटहरीसहित अन्य क्षेत्रका बिरामीलाई सहज होस् भन्ने उदेश्यले आफूले साँझको समयमा इटहरीमा सेवा उपलब्ध गराउँदै आएको उनले जनाए ।
Discussion about this post