अनियमितताको आरोप लागेपछि इटहरीका मेयर भन्छन् – ‘प्रमाणित भए एक मिनेट मेयरको कुर्सीमा बस्दिन’

इटहरी : इटहरी उपमहानगरपालिकामा विभिन्न शीर्षकमा आर्थिक अनियमितता भएको आरोप लागेपछि मेयर हेमकर्ण पौडेलले खण्डन गरेका छन् ।

आर्थिक अनियमितता भएको कुरा अहिलेसम्म सामाजिक सञ्जालदेखि संसदमासमेत कुरा उठेपनि छानबिनको मागसहित निवेदन भने नपरेको जनाउँदै मेयर पौडेलले खण्डन गरेका हुन् ।

उनले शनिबार एक भिडियो सन्देश जारी गर्दै निराधार र कपोकल्पित रूपमा आफूमाथि आरोप लगाइएको बताएका छन् ।

‘विद्युतीय बस खरिदमा अनियमितताको कुरा सामाजिक सञ्जालमा कुरा उठेको छ, तर कहीँ उजुरी परेको छैन,’ पौडेलले भने, ‘नीति बनाउने ठाउँमा बस्ने सांसदहरू नीतिगत भ्रष्टाचार भयो भनेर अरूलाई कमजोर लगाउन लागिपरेका छन् । त्यसका आधारमा दलका जिम्मेवार साथीहरू पनि कागले कान लग्यो भने कान छाम्नुपर्ने सट्टामा कागको पछि कुद्न लागेका छन् ।’

उनले छानबिन गर्न सबैतिरबाट खुल्ला रहेकोसमेत जनाए ।

‘संसदभित्र उठेको कुरा मैले छानबिन बनाउन सक्दिन । सरकारी संयन्त्रमार्फत संसदीय छानबिन समिति बनाउनुप¥यो,’ मेयर पौडेलले भने, ‘राजनीतक रूपमा कसैले रोटी सेक्न जरूरी छैन ।’

उनले राजनीतिक दलहरूले आग्रह, पूर्वाग्रहका आधारमा त्यतिकै आरोप लगाएको दाबी गरे ।

‘आर्थिक अनियमिततामा मेरो कार्यपालिका, यहाँको संयन्त्र कहीँ सहभागी भएको कसैले प्रमाणित गर्यो भने म एक मिनेट मेयरको कुर्सीमा बस्दिन, धेर बकबक नगर्नुहोस्,’ उनले थपे, ‘जिम्मेवार ठाउँमा बसेर जिम्मेवारी निभाउनुहोस् ।’

यहाँका पाँच राजनीतिक दलले केही दिनअघि एक विज्ञप्ति जारी गर्दै सार्वजनिक सुनुवाइसँगै केही विविध विषयको सार्वजनिक गर्नुपर्ने माग राखेका थिए । सो विज्ञप्तिबारे मेयर पौडेल आक्रोशित बने ।

उनले एमाले इटहरी नगर अध्यक्ष रुपेश बस्नेतलाई कर्मचारी नियुक्तिमा बार्गेनिङ गरेको भिडियो आफूसँग भएकोसमेत दाबी गरे ।

‘अहिलेको अध्यक्ष तत्कालीन पार्टीको सचिव हुनुहुन्थ्यो, यहाँभित्र उपमहानगरले खोलेका कर्मचारीको भ्याकेन्सीको बार्गेनिङ गर्न आउने मान्छे उहाँ हो नि,’ मेयर पौडलको दाबी छ, ‘प्रमाणित पुर्याउनुपर्छ भने म भिडियो फुटेजसहित प्रमाण उपलब्ध गराउँछु । कुन नैतिकताले कर्मचारी कहाँबाट नियुक्ति भए भन्ने ?’

नेकपा एमालेलाई संसदीय मर्यादा बमोजिम र राजनीतिक संस्कारका आधारमा संवादमा आउन आग्रह गरे । ‘एमाले इटहरीको नेतृत्वसँग कहाँ नैतिक बल छ ? एक महिनासम्म निरन्तर सभामा अनुपस्थित भएको कुरा आम इटहरीबासीले देखेका छन्,’ उनले भने, ‘जसरी हस्तक्षेप भयो, त्यसकारण कुनै पनि जनप्रतिनिधिले स्वतन्त्र ढंगले काम गर्न पाउँदैनन् ।’

बजेट कार्यान्वयन गर्न एमालेले असहयोग गरेको र बाहिर गलत प्रचारबाजी गर्ने गरेको उनको भनाइ छ । राजनीतिक कारणले गर्दा हालसम्म भुक्तानी नभएको उनले प्रष्ट्याए ।

एमालेप्रति आक्रोशित बनेका मेयर पौडेलले थपे, ‘हिजोका दिनमा बजेटबिहीन पालिका बनाउनुपर्छ भन्ने, आज कुन नैतिकताले उपभोक्ताले भुक्तानी पाएनन् भन्ने ?’

भिडियो